Ֆրանսիայում ռեստորանի տիրոջը մեղադրել են ռասիզմի համար այն բանից հետո, երբ նա Փարիզի արվարձանում գտնվող իր հաստատությունից դուրս է արել 2 մուսուլման կանանց: Այս մասին գրում է Le Parisien-ը:
Հաղորդվում է, որ դեպքը տեղի է ունեցել Le Cenacle ռեստորանում: Ռստորանի տերը երկու մուսուլման կանանց խնդրել է դուրս գալ հաստատությունից, քանի որ, ինչպես նա հայտարարել է, «բոլոր մուսուլմաններն ահաբեկիչ են»:
Դեպքն արձանագրել են հսկող տեսախցիկները, հետո տեսագրությունը սկսել է տարածվել սոցցանցերում: Տեղի մուսուլման համայնքի անդամները բողոքի ակցիա են կազմակերպել ռեստորանի մոտ՝ պահանջելով ներողություն խնդրել տեղի ունեցածի համար կամ ընդհանրապես փակել հաստատությունը:
Պարբերականը նշում է, որ ռեստորանի տիրոջը ոստիկանությունն արդեն հարցաքննել է «ազգային-կրոնական խտրականության նշանի» կասկածանքով: Բիզնեսմենը ներողություն է խնդրել և իր վարքը բացատրել է նրանով, որ ինքը «հունից դուրս է եկել», և իր մոտ «ամեն ինչ խճճվել է» այն բաից հետո, երբ իր ընկերը զոհվել է Փարիզում անցած տարվա նոյեմբերին «Բատակլան» համերգասրահի վրա ահաբեկիչների հարձակման հետևանքով:
