«Առաջին լրատվական»-ի զրուցակիցն է ԱԺ «Ժառանգություն» խմբակցության պատգամավոր Զարուհի Փոստանջյանը:
– Տիկին Փոստանջյան, որպես իրավաբան ի՞նչ տպավորություն ունեք Սյունիքի նախկին մարզպետ Սուրիկ Խաչատրյանի տան մոտ կատարված սպանության քրեական գործի ընթացքից: Հատկապես, երբ նախօրեին մեղադրանք առաջադրվեց սպանված Ավետիք Բուդաղյանի վիրավոր եղբորը՝ Արտակ Բուդաղյանին:
– Ինձ հասանելի բոլոր տվյալներից ելնելով՝ միանշանակ կարող եմ պնդել, որ ՀՀ զինվորական դատախազի կողմից գործի քննությունն ուղղորդվում է: Այսինքն` այս պահին անկողմնակալ քննություն տեղի չի ունենում: Արդեն կան խախտումներ, որոնց մասին հայտարարել է նաև Ա. Բուդաղյանի փաստաբան Հայկ Ալումյանը: Եվ Մարդու իրավունքների եվրոպական կոնվենցիայի 6-րդ հոդվածի՝ արդար դատաքննության ենթատեքստից ելնելով՝ միանշանակ կարող եմ ասել, որ արդեն իսկ մարդու իրավունքների խախտումներ կան: Այս պահին խախտվում են և Ա. Բուդաղյանի, և նրա սպանված եղբոր իրավունքները:
– Իսկ ինչո՞ւ է ուղղորդվում:
– Որպեսզի կարողանան գլխավոր կասկածյալին հնարավորինս պաշտպանության տակ վերցնել: Տվյալ դեպքում գլխավոր կասկածյալը բոլորիս է հայտնի՝ դա Սյունիքի նախկին մարզպետ Ս. Խաչատրյանն է: Իսկ դա արվում է, որովհետև նա գործող իշխանությունների հիմնասյուներից մեկն է:
– Ասելով, որ գլխավոր կասկածյալը Սյունիքի նախկին մարզպետ Ս. Խաչատրյանն է՝ ի՞նչ նկատի ունեք: Հնարավո՞ր է, որ նա կրակած լինի Բուդաղյան եղբայրների վրա, ինչպիսի ենթադրություններ շրջանառվում են դեպքի հաջորդ իսկ օրվանից:
– Ես ունեմ իմ ներքին համոզմունքը, որ՝ այո: Հարգելով անմեղության կանխավարկածը՝ ես ունեմ համոզմունք, որ տվյալ հանցագործությունները հենց նրա նախաձեռնությամբ են տեղի ունեցել:
– Այսինքն` այսօր էլ և այսքանից հետո էլ իշխանությունները նորից պաշտպանո՞ւմ են հանցավոր համակարգի ներկայացուցիչներին:
– Ես այլ կարծիք չեմ կարող ունենալ, որովհետև ՀՀ զինդատախազը հայտարարություններ էր անում ու մամուլի ասուլիսով հանդես գալիս, թե Ս. Խաչատրյանը տվյալ պահին միանշանակ այնտեղ չի եղել: Մինչդեռ այդ պահին նրան հասանելի չէին որևիցե փորձաքննության տվյալներ: Եվ եթե դու չունես փորձաքննության տվյալները, դու դեռ չես հայտարարել քրեական գործի նախաքննության ավարտի մասին, չունես մեղադրական եզրակացություն, նման կարծիքներ հայտարարելն ու պնդելը միանշանակ խոսում է այն մասին, որ այս անձը ապօրինի իշխանությունների կողմից վերցված է պաշտպանության տակ, որպեսզի չպատժեն իրական մեղավորին:
– Բայց այդ միջադեպից հետո հրապարակված տեսանյութում, որը պատկերում էր գործողությունների ընթացքը, Ս. Խաչատրյանը չէր երևում:
– Գիտեք ինչ, դա ապացույցների շարքին դասելու համար դեռ պետք էր հատուկ փորձաքննության ենթարկել: Դուք արդեն ծանո՞թ եք փորձաքննության տվյալների հետ: Ո՞վ է հրապարակել այդ ապացույցը, դուք գիտե՞ք: Իսկ եթե այդպես է, ապա ո՞վ է հեղինակն այդ ապացույցի: Եվ այդ ինչպե՞ս էր այդ ապացույցը գտնվում, օրինակ, Սյունիքի մարզպետարանի աշխատակիցների ձեռքում: Կամ ինչպես էր այդ տեսանյութի հետ կապված պաշտոնական հաղորդագրությունը տեղադրվել կայքում: Եվ երբ այս բոլոր փաստերը հրապարակված և հասանելի են յուրաքանչյուրի համար, ապա հասկանալի է, որ իրոք ուղղորդվում է այն գործընթացը, որպեսզի հնարավորինս կոծկեն իրականությունը և պաշտպանեն իրական մեղավորին:
– Այդ նույն տեսանյութի մեջ նկատելի է, որ նախ Ավետիք Բուդաղյանն է զինված հարձակում գործում: Ավելի ուշ Ս. Խաչատրյանն է հայտարարում, որ իր տան վրա զինված հարձակում է տեղի ունեցել ու իր ընտանիքի անդամներն ընդամենը պաշտպանվել են:
– Ես նորից եմ ասում, այդ տեսանյութին հղում անելը սխալ է: Այդպիսի մոնտաժված տեսանյութ է դրվել շրջանառության մեջ, որպեսզի հասարակությանը թյուրիմացության մեջ գցեն: Նույնիսկ դատախազությունը հայտարարեց, որ այդ տեսանյութը չպետք է դրվեր շրջանառության մեջ, որովհետև դեռ չկան փորձաքննության պատասխանները: Մարզպետարանի աշխատակիցները երբ այդ տեսանյութի մասին հայտարարում են և դրա հետ կապված հաղորդագրությունը տեղադրում պաշտոնական կայքում, միանշանակ ապացուցում են, որ հանցագործության հեղինակը Ս. Խաչատրյանն է: Մոնտաժված տեսանյութը տեղադրվել է հենց իր կողմից: Անձամբ միգուցե ինքը չի արել, բայց իր նախաձեռնությամբ է արվել:
– Այսքանից հետո հնարավո՞ր է այդ գործում այնպիսի շրջադարձ լինի, որ Ս. Խաչատրյանի որդուն ազատ արձակեն, փոխարենը դատապարտեն Ա. Բուդաղյանին:
– Ես կարծում եմ, որ մեր հասարակության խիղճը դեռ կենդանի է, և մենք դա թույլ չենք տա: Ես համոզված եմ, որ այդ պահը մենք չենք ապրի:
