«Ամեն բան սկսվել է նրանից, որ այս տարվա մայիս ամսին ինձ հետ կապվել են ԱՄՆ դեսպանատան աշխատակիցները, առաջարկել են մասնակցել Open World 2016 ծրագրին։ Ես իմ համաձայնությունը տվել եմ, այնուհետև հանդիպել եմ դեսպանատան աշխատակիցների հետ, շփվել ենք։ Որոշ ժամանակ անց ինձ ուղարկել են application form կոչվածը, լրացրել եմ, ուղարկել եմ նրանց։ Բայց երեկ «Հրապարակ թերթից տեղեկանում եմ, որ հաշվի առնելով ֆեյսբուքյան իմ որոշ գրառումներ՝ որոշում է կայացվել ինձ մասնակիցների ցանկից հանել»,- «Առաջին լրատվական»-ի հետ զրույցում ասաց «Արարատ» հեռուստաընկերության տնօրեն Միհրան Հակոբյանը։
Հիշեցնենք, որ «Հրապարակ» օրաթերթը երեկ գրել էր, որ նոյեմբերի 8-ին ԱՄՆ-ում կայանալիք նախագահի ընտրություններին տեղի իշխանությունները տարբեր երկրներից դիտորդներ են հրավիրել ԱՄՆ։ Հայաստանից ԱՄՆ պետք է մեկնեն մեկական ներկայացուցիչներ ՀՀԿ-ից, ՀՅԴ-ից, «Ազատ դեմոկրատներ»-ից, «Քաղաքացիական պայմանագրից», «Լուսավոր Հայաստան»-ից: Թերթը գրել էր, որ խմբի նախնական կազմում է եղել նաև «Արարատ» հեռուստաընկերության տնօրեն Միհրան Հակոբյանը, սակայն այժմ նրա անունը չկա վերջնական ցուցակում. պատճառը հուլիսյան իրադարձությունների ժամանակ և դրանցից հետո նրա պահվածքն է, ֆեյսբուքյան գրառումները:
Թերթի հրապարակումը կարդալուց հետո Հակոբյանը զանգահարել է դեսպանատուն և պարզել, որ՝ այո, իր անունը հանված է մասնակիցների ցանկից։ Դեսպանատնից պարզաբանել են, որ ծրագրի ուղղությունը չի համապատասխանում իր ֆեյսբուքյան գրառումներին։
«Հասկանում եք՝ խնդիրն ինչումն է, ես երբեք չեմ դիմել ԱՄՆ դեսպանատուն մուտքի վիզայի համար, այս ծրագրին էլ ես չեմ դիմել, իրենք են հրավիրել։ Եվ ստացվում է, որ հրավիրող կողմը իր ծրագրում ինչ-որ բան է փոխում, և հրավիրված մարդուն տեղեկացնում են թերթով կամ ավելի ճիշտ՝ թերթային «սլիվով»։ Ես այդպես էլ չհասկացա, թե դա բարեկրթության որ սահմաններում է տեղավորվում»,- հավելեց Հակոբյանը։
Միհրան Հակոբյանը չի փորձել կոնկրետ պարզաբանում ստանալ իրեն ծրագրից հեռացնելու հարցում։ Նրա խոսքով՝ Ֆեյսբուքն իր անձնական տիրույթն է, որտեղ ինքը հրապարակավ արտահայտում է կարծիքներ և միայն ընկերների համար։ «Ինչ կարծիք որ արտահայտել եմ, շարունակում եմ դրա կրողը լինել: Սա՞ է խոսքի ազատությունը, սա՞ է ԱՄՆ դեսպանատան ազդակը: Սրանից մի հետևություն կարելի է անել՝ Հայաստանում ԱՄՆ դեսպանատան չինովնիկները կա՛մ մանր քաղաքական աճպարարությամբ են զբաղված, կա՛մ էլ զինված խմբի ու նրանց ֆեյսբուքյան քֆուրչիների բանդայի թիկունքն են ամուր պահում»:
Ավելի մանրամասն՝ տեսանյութում:
