Եվրոպական դիվանագիտության ղեկավար Ֆեդերիկա Մոգերինին Սիրիայում հակամարտության կողմերին կոչ է արել անմիջապես դադարեցնել մարտերը` Հալեպ և այլ դժվարամատչելի շրջաններ հումանիտար օգնություն հասցնելու և տուժած խաղաղ բնակիչներին տարհանելու համար, հայտնում է gazeta.ru-ն:
«ԵՄ-ն կրկին կոչ է անում մարտերի անհապաղ հումանիտար դադարի, որպեսզի ապահովվի բժշկական տարհանումը և բժշկական դեղորայք, ուտելիք և ջուր հասցվի Հալեպի արևելյան մաս և մյուս պաշարված և դժվարամատչելի շրջաններ»,- ասված է դիմումում:
Միաժամանակ Եվրամիությունը հակամարտության բոլոր կողմերից պահանջել է անհապաղ դադարեցնել հարձակումները խաղաղ բնակչության և քաղաքացիական օբյեկտների վրա, այդ թվում՝ բժշկական հիմնարկների, դպրոցների, շուկաների և ներքին տեղահանվածների ճամբարների:
Եվրամիությունը դիմումում նաև ընդգծել է, որ նման հարձակումները «միջազգային հումանիտար իրավունքի նոր և կոպիտ խախտումներ են», և «լուրջ անհանգստություն» է հայտնել Հալեպի տարածքում քիմիական զենքի օգտագործման մասին հաղորդագրությունների կապակցությամբ:
