«Ցավոք այս հայտարարություններին, քննարկումներին չի մասնակցում կարևոր կողմը՝ Հայաստանի տերը՝ ՀՀ քաղաքացին: Նրանց կամքը պետք է հարցնել,- «Առաջին լրատվական»- ի հետ զրույցում ասաց Գերագույն խորհրդի անդամ Ազատ Արշակյանը՝ անդրադառնալով փոխզիջումների չգնալուն՝ Ժ. Սեֆիլյանի հայտարարությանը և իշխանությունների դիրքորոշմանը՝ ստեղծված աննախադեպ իրավիճակում: -Եթե դուք մեզ դարձրել եք լուսատեխնիկական միջոցների զոհ, մեր երկիրը դարձրել եք ձեզ համար մրցակցության թատերաբեմ, մեկ անգամ մեզ հարցրեք: Ի՞նչ է նշանակում ոչ մի քայլ հետ: Երկու կողմից էլ վերջնագիր է ներկայացվում, դա անթույլատրելի է, մենք ենք դրա զոհը»:
«Շանտաժի տարր կա վերջնագրերի մեջ՝ մենք ձեզ չենք խնայում, ով ավելի պակաս հայրենասեր է, նա ավելի պակաս զիջող է. հիմա բանաձևն այդպիսին է: Պետք է երկու կողմն էլ հանդես գան հայտարարությամբ, որ միջնորդի, հաշտարարի կարիք են զգում»,- նշեց ԳԽ անդամը:
Ազատ Արշակյանի դիտարկմամբ՝ քանի դեռ այս վիճակն առկա է, ոչ թե իշխանության, այլ Հայաստանի հեղինակությունն է անկում ապրում:
Անդրադառնալով հարցին՝ ի՞նչ պետք է անել, որպեսզի չկրկնվի նախօրեի բախումը, որը ծանր հետևանքներ ունեցավ. Ա. Արշակյանը պատասխանեց, որ պետք է հաշտարարներին՝ մասնավորապես Վիտալի Բալասանյանին կրկին հրավիրել. «Թող նրան թույլատրվի խորհրդականներ հավաքել՝ իրավաբաններ, հոգեբաններ, հոգևորականներ, մտավորականներ, պատգամավորներ… թող հավաքվեն, խաղաղության բանաձև մշակեն, որում կարտահայտի հայրենիքի շահերը:
Ազատ Արշակյանի խոսքով՝ կողմերը հաղթողի և պարտվողի խնդիր են ուզում լուծել, մինչդեռ պարտվում է Հայաստանի Հանրապետությունը: Նա կոչ արեց. «Եթե հայրենասեր եք, զոհաբերեք ձեր խմբի շահերը հանուն հայրենիքի»:
Մանրամասները՝ տեսանյութում:
