Վրաստանի վարչապետ Բիձինա Իվանիշվիլին այսօր կայացած մամլո ասուլիսում հայտարարել է, որ իր էներգիան կբավականացնի ևս 20 տարի, և քաղաքականությունից հեռանալուց հետո էլ ինքը մտադիր է վերահսկել քաղաքական գործընթացները երկրում, հաղորդում է «Նովոստի Գրուզիա»-ն:
Հունիսի վերջին Իվանիշվիլին հայտարարել էր, որ երկրի կառավարությանն իր օգնությունը պետք չի լինի հոկտեմբերին կայանալիք նախագահական ընտրություններից հետո, քանի որ կլինի «բացարձակ այլ իրավիճակ»:
«Եկեք իրարանցում չստեղծենք քաղաքականությունից իմ հեռանալու շուրջ: Իմ էենրգիան կբավականացնի ևս 20 տարի՝ ինչպես քաղաքականությունում, այնպես էլ քաղաքացիական ոլորտում ակտիվ մնալու համար»,- ասել է նա և հավելել, որ հեռանալու դեպքում կվերահսկի քաղաքական գործընթացները, սակայն չի կառավարի դրանք:
Նրա խոսքերով՝ ներկայում «Վրացական երազանք» դաշինքը կատարում է իր խոստումները: Միևնույն ժամանակ, վարչապետը խոստացել է, որ նախօրոք կտեղեկացնի հասարակությանն ու լրագրողներին իր հեռանալու մասին:
«Ինչ վերաբերում է իմ հեռանալուն, ես չեմ պատրաստվում հեռանալ երկրից, և թող ոչ ոք չմտածի, որ ես կհեռանամ այդ գործընթացներից: Բոլոր խոստումները կատարված են, ես ավելի լավ եմ տեսնում՝ ինչ է պետք հասարակությանը» – հավելել է վարչապետը:
