Ազգային ժողովն իր կայքում պարզաբանում է ներկայացրել «Առաջին լրատվական»-ի այսօրվա «Ինչպես է Հովիկ Աբրահամյանը շարունակում «լափել» պետական միջոցները» հրապարակման հետ կապված:
Հիշեցնենք, որ այդ հրապարակման մեջ նշված էր, որ ԱԺ-ն ապրիլին երկու փուլով ավելի քան 9 մլն դրամի պայմանագրեր է կնքել Հովիկ Աբրահամյանին պատկանող «Պլազա Սիստեմս» ընկերության հետ, որ գտնվում է Ամիրյան 4 հասցեում գտնվող նորակառույց «NATIONAL» հյուրանոցում, որը կրկին պատկանում է ԱԺ նախագահին:
ԱԺ պարզաբանման մեջ նշված է, որ «նշված օրերին, հատկապես ապրիլի 24-ի հետ կապված, Հայաստանում են գտնվել օտարերկրացի հյուրեր, միջազգային բազմաթիվ պատվիրակություններ, այդ թվում՝ խորհրդարանական պատվիրակություններ, որոնց համար ամրագրվել ու պատվիրվել են հյուրանոցային համարներ»:
«Մասնավորապես ապրիլի 22-28-ը Հայաստան են այցելել Եվրախորհրդարանի ԵՄ-Հայաստան պատգամավորական բարեկամության խմբի 16 հոգանոց պատվիրակությունը, Ֆրանսիա-Հայաստան պատգամավորական բարեկամության խմբի անդամները, Եվրոպական խորհրդարանի պահպանողականների և ռեֆորմիստների խմբակցության անդամները և այլք: ԱԺ-ն համագործակցում է «Արմենիա Մարիոթ», «Գոլդեն Փելես», «Գոլդեն թյուլիփ» հյուրանոցների հետ: Սակայն ելնելով այդ օրերին Երևանի հյուրանոցների ծանրաբեռնվածությունից եւ մյուս հյուրանոցներում համարների բացակայությունից, ԱԺ աշխատակազմը եվրոպացի հյուրերին տեղավորել է «Նացիոնալ» հյուրանոցում, քանի որ հարցված հյուրանոցներից տվյալ ժամանակահատվածում միայն այնտեղ են հնարավորություն ունեցել ապահովել հյուրանոցային համարներ: Ընդ որում, այդ ծառայության համար որպես կանխավճար վճարվել է 3,5 մլն դրամ, իսկ վճարված ողջ գումարը կազմել է 5,6 մլն դրամ և ոչ թե ավելի քան 9 մլն, ինչպես հիշյալ հրապարակման մեջ, կրկին դրսևորելով իր միտումնավոր պահվածքը, նշել էր 1in.am-ը»,- նշված է պարզաբանման մեջ:
Նշենք, սակայն, որ ԱԺ-ն ապրիլի 30-ին մոտ 5,6 մլն դրամի 7 պայմանագիր է կնքել «Պլազա սիստեմս» ընկերության հետ: Բայց դա ամբողջը չէ, և ապրիլի 22-ին էլ 3,5 մլն դրամ արժեցող չորս՝ երկուական 810 հազար դրամ արժեցող և երկուական 972 հազար դրամ արժեցող պայմանագրեր է կնքել: Եվ երկու փուլով կնքված 11 պայմանագրերը միասին ԱԺ բյուժեից այդ ընկերության են փոխանցել մոտ 9,1 մլն դրամ:
««Պլազա Սիստեմս» ընկերությունը ԱԺ նախագահ Հովիկ Աբրահամյանի անվան հետ կապելու վերաբերյալ ևս մեկ անգամ ստիպված ենք կրկնել, որ ԱԺ նախագահը բիզնեսով չի զբաղվում»,- նշված է պարզաբանման շարունակության մեջ:
Նշված չէ, սակայն, որ այդ հյուրանոցը ԱԺ նախագահին կամ նրա որդուն չի պատկանում: Իսկ ամիսներ առաջ «Առաջին լրատվական»-ի հետ զրույցում «NATIONAL»-ի աշխատակցուհին հաստատել էր, որ հյուրանոցն ու գրասենյակային հսկա հատվածը Աբրահամյաններին է պատկանում: Նաև հայտնել էր, որ գրասենյակային հատվածում ավելի հարմարավետ գնով վարձակալական տարածքներ ձեռք բերելու համար կարող են պայմանավորվել Աբրահամյանների հետ: Իսկ եթե Հ.Աբրահամյանն իրեն կամ իր որդուն պատկանող հյուրանոցում ԱԺ բյուջեի հաշվին ԱԺ հյուրերին է տեղավորում, դա նշանակում է, որ նա ուղղակի բիզնեսով է զբաղվում և այն ծաղկեցնում է պետբյուջեի հաշվին: Ինչպես որ պետբյուջեի հաշվին էժան տասնյակ հազարավոր լիտրերով դիզվառելիք է ձեռք բերում նրա նախկին պատգամավոր եղբայր Հենրիկ Աբրահամյանը:
