ՀՀ-ում մարդկանց շահագործման (թրաֆիքինգի) հարցերով խորհրդի այսօրվա նիստում ՀՀ փոխվարչապետ, խորհրդի նախագահ Արմեն Գևորգյանը, մինչև օրակարգային հարցերին անցնելը, շնորհակալություն է հայտնել խորհրդում ընդգրկված բոլոր պետական մարմինների, հասարակական կազմակերպությունների ներկայացուցիչներին` վերջին տարիների համատեղ արդյունավետ աշխատանքի համար, որի արդյունքում Հայաստանն իր դիրքերը բարելավել է ԱՄՆ պետքարտուղարության 2012 թ. մարդկանց թրաֆիքինգի մասին զեկույցում` տեղ գտնելով երկրների առաջին խմբում:
«Կարևոր է, որ իրականացված աշխատանքը գնահատվում է, բայց այդ գնահատականը մեզ չպետք է հանգստացնի. սա վկայում է այն մասին, որ խնդիրը ՀՀ իշխանությունների ուշադրության կենտրոնում է, բայց անելիքներ դեռ կան, և միջազգային հանրության, քաղաքացիական հասարակության, համապատասխան մարմինների աջակցությամբ առկա խնդիրները ևս պետք է իրենց լուծումներն ստանան»,- նշել է Ա. Գևորգյանը:
Նիստում խորհրդին կից միջգերատեսչական աշխատանքային խմբի ղեկավար Վահրամ Կաժոյանը ներկայացրել է թրաֆիքինգի ենթարկված անձանց համար փոխհատուցման համակարգի ստեղծման և Ազգային ուղղորդման կարգի վերանայման ուղղությամբ կատարված աշխատանքների ընթացքը: Նշվել է, որ ՀՀ ոստիկանության կողմից մշակվում են Ազգային ուղղորդման կարգի փոփոխություններ, որոնք ուղղված են լինելու զոհերի նույնականացման ընթացակարգերի պարզեցմանը: ՀՀ աշխատանքի և սոցիալական հարցերի նախարարությունում քննարկվում է զոհերի աջակցության հիմնադրամի ձևավորման միջոցով փոխհատուցման համակարգի ստեղծման հարցը: Համապատասխան փաստաթղթերի նախագծերը խորհրդին կից աշխատանքային խմբին կներկայացվեն մինչև սեպտեմբեր: Վ. Կաժոյանը նշել է, որ պայմանավորվածություն է ձեռք բերվել նախագծերը միջազգային փորձագիտական կարծիքի ներկայացնելու վերաբերյալ:
ՏԿՆ հասարակայնության հետ կապերի բաժնից «Առաջին լրատվական.-ին հայտնում են, որ Ա. Գևորգյանն առաջարկել է անհրաժեշտ նախագծերը և օրենսդրական փաթեթները պատրաստել նախանշված ժամկետներում` ԱԺ աշնանային նստաշրջանում ներկայացնելու և արդեն 2014թ-ից դրանց կիրառությունն ապահովելու համար: Նա նաև կարևորել է նախագծերի քննարկումներին ոլորտային ՀԿ-ների մասնակցությունը:
Վ. Կաժոյանը խորհրդի անդամներին ներկայացրել է նաև ԱՄՆ պետքարտուղարության 2012 թ. մարդկանց թրաֆիքինգի մասին զեկույցում ներկայացված առաջարկները` միաժամանակ նշելով, որ դրանց մեծ մասն արդեն իսկ ընդգրկված է «Հայաստանի Հանրապետությունում 2013-2015 թթ. մարդկանց շահագործման (թրաֆիքինգի) դեմ պայքարի կազմակերպման ազգային ծրագրում», մի մասն աշխատանքային խմբի կողմից քննարկման փուլում է, որից հետո կներկայացվի համապատասխան գերատեսչություններին` անհրաժեշտ քայլեր ձեռնարկելու համար:
Ա. Գևորգյանը մասնավորապես անդրադառնալով հարկադիր աշխատանքի հնարավոր զոհերի հայտնաբերման ոլորտին վերաբերող առաջարկներին` կարևորել է աշխատանքային տեսուչների ուսուցումների կազմակերպումը: Նա նաև հանձնարարել է համապատասխան մարմինների հետ քննարկել ՀԿ-ների ներկայացուցիչների առաջարկները` նման դեպքերի բացահայտման համար անսպասելի տեսչական ստուգումների իրականացման հնարավորության, նաև ճամփորդական գործակալությունների ոլորտում հնարավոր ռիսկերի կանխման նպատակով աշխատանքների իրականացման վերաբերյալ:
Նիստում քննարկվել է նաև 2014 թ. թրաֆիքինգի դեմ պայքարին ուղղված ծրագրերի և միջոցառումների իրականացման համար անհրաժեշտ ֆինանսական միջոցների հատկացման հարցը: Տեղեկացվել է, որ ՀՀ աշխատանքի և սոցիալական հարցերի, սպորտի և երիտասարդության, առողջապահության նախարարությունների կողմից արդեն համապատասխան հայտերը ներկայացվել են` Պետական միջնաժամկետ ծախսերի ծրագրում և 2014թ. բյուջեի նախագծում հաշվի առնելու համար:
