«Առաջին լրատվական»-ի զրուցակիցն է Ռուսաստանի Դաշնության արտաքին գործերի նախարարության խոսնակ Մարիա Զախարովան։
– Ե՞րբ է կայանալու Սարգսյան-Ալիև հանդիպումը: Ռուսական կողմի դիրքորոշումն ինչպիսի՞ն է լինելու:
– Հակամարտող կողմերն իրենք պետք է ներկայացնեն այդ տեղեկությունը: Ես կարող եմ ասել, որ ռուսական կողմի դիրքորոշումն ուղղված է մեկ նպատակի՝ այս հակամարտության շուտափույթ խաղաղ կարգավորմանը, որը ոչ միայն ձգձգվում է, այլև պահանջում է հանգուցալուծում: Եվ մենք անում ենք ամեն ինչ դրա համար: Ակտիվ ջանքեր են գործադրում և՛ Ռուսաստանի Դաշնության նախագահը, և՛ արտգործնախարարը, և՛ ընդհանրապես արտաքին քաղաքական գերատեսչությունը, երկկողմանի, բազմակողմանի խողովակներով, Մինսկի խմբի շրջանակում, որովհետև մենք հասկանում ենք, որ հակամարտության կարգավորման երկարաձգման ամեն մի օր սպառնալիք է խաղաղ բնակիչներին:
– Ի՞նչ եք կարծում, արդյոք Սանկտ Պետերբուրգի հանդիպումով Ռուսաստանը փորձ չարե՞ց իր «ձեռքը վերցնել» հակամարտության կարգավորումը՝ խաղից դուրս թողնելով Մինսկի խմբին:
– Պետերբուրգի հանդիպումից առաջ բոլորը հայտնում էին իրենց մտավախությունը, որ Ռուսաստանը, ըստ էության, մոնոպոլացնում է կարգավորման գործըթնացը, չի ուզում դրան մասնակից դարձնել Մինսկի խմբին, բայց ինչպես ցույց տվեց հանդիպումը, բոլոր համանախագահները տեղեկացվել էին հանդիպման մասին, չէին զգում իրենց լուսանցքից դուրս: Մենք լավ հասկանում ենք ՄԽ աշխատաոճը ու հարգանքով ենք մոտենում: Իսկ Պետերբուրգի հանդիպումն ամենևին նորարարություն չէր, այն կողմերի միջև երկխոսության ձևերից մեկն էր:
– Հետաքրքիր է՝ Ռուսաստանի մեդիա դաշտը տեղյա՞կ է՝ ո՞վ է Գարեգին Նժդեհը:
– Կարծում եմ՝ Հայաստանը հիմա ավելի արդիական թեմա ունի քննարկելու՝ Ղարաբաղյան հակամարտության լուծումն է: Հիմա մենք գործի ենք դրել միջնորդական բոլոր ջանքերը, որ Լեռնային Ղարաբաղի հակամարտությունը լուծվի կամ մոտեցվեն Հայաստանի ու Ադրբեջանի դիրքորոշումները խաղաղ կարգավորմամբ կոնֆլիկտը հանգուցալուծելու համար:
– Տիկի՛ն Զախարովա, ինչ եք կարծում Նժդեհի արձանի վերաբերյալ: Կարծում եք՝ դա նացիզմի խորհրդանի՞շն է:
– Այս առնչությամբ ՌԴ ԱԳՆ-ում ճեպազրույցի ժամանակ մեկնաբանություն եմ արել ու զարմացած եմ, որ այն խեղաթյուրվել է, այդ թվում՝ լրագրողների կողմից: Մենք ոչ միայն հարգում ենք, այլև աշխատում Հայաստանի հետ ՄԱԿ-ի միջազգային հարթակում նացիզմի հերոսացման որևէ հնարավորություն թույլ չտալու ուղղությամբ, այս հարցում զգում ենք մեր հայ գործընկերների հուսալի թիկունքը: Այստեղ չի կարող լինել որևէ երկակի ստանդարտ: Հայաստանի հետ աշխատանքն այս ուղղությամբ մենք գնահատում ենք արդյունավետ: Իսկ արձանի տեղադրման հետ կապված կարող եմ ասել, որ դա, անշուշտ, Հայաստանի Հանրապետության ներքին գործն է: Ես խնդրում եմ՝ իմ մեկնաբանությունը բառացի մեջբերել, չխեղաթյուրել, որ այն չաշխատի հօգուտ նրանց, որոնք Հայաստանի ընկերները չեն, այնպիսի ընկեր, ինչպիսին Ռուսաստանն է: