Վատիկանի մամլո ծառայության ղեկավար Ֆեդերիկո Լոմբարդին կոչ է արել լուրջ խնդիրներ չփնտրել Թուրքիայի հետ հարաբերություններում` կապված Հռոմի պապի կողմից Հայոց ցեղասպանության ճանաչման հետ, հայտնում է RIA Novosti-ն:
Ուրբաթ օրը Հայաստանի նախագահի նստավայրում իր ելույթի ժամանակ Հռոմի պապ Ֆրանցիսկոսը երկրորդ անգամ է արտասանել «Հայոց ցեղասպանություն» արտահայտությունը: 2015 թվականին ցեղասպանության 100-րդ տարելիցին Ֆրանցիսկոսը պատարագ է մատուցել զոհերի հիշատակին Վատիկանի Սուրբ Պետրոս տաճարում և ողջ մարդկությանն ուղղված իր դիմումում նշել է, որ հայերի ցեղասպանությունը XX դարի առաջին ցեղասպանությունն է:
«Սուրբ Աթոռի և Թուրքիայի միջև հարաբերությունները լավ են: Ես չեմ համարում, որ այստեղ պետք է դիտարկել լուրջ խնդիրներ»,- ասել է Լոմբարդին Գյումրիում մամլո ասուլիսի ժամանակ` մեկնաբանելով Թուրքիայի հիվանդագին արձագանքը Ֆրանցիսկոս պապի կողմից «ցեղասպանություն» բառի օգտագործմանը: Լոմբարդին նշել է, որ անցյալին դիմելը արվում է ոչ թե այն բանի համար, որպեսզի փորփրեն վերքերը, այլ բացառապես այն բանի համար, որպեսզի օգնեն սահմանելու փոխըմբռնման, երկխոսության և հաշտեցման հիմքերը:
Նրա կարծիքով` Հայաստանի նախագահ Սերժ Սարգսյանը նույնպես ունեցել է շատ ճշգրիտ ձևակերպումներ խաղաղությանը և հաշտեցմանը ուղղված իր խոսքում: «Եթե չեմ սխալվում, նա (Սարգսյանը) իր խոսքում օգտագործել է «գթասրտություն» բառը այն մտքով, ինչով և պապը: Խոսքը գնում է ապագայի կառուցմանը, որը կլինի հաշտեցման, խաղաղության և ներդաշնակության ապագա»,- Լոմբարդիի խոսքերն է մեջբերում Sputnik Հայաստան գործակալությունը:
