Ինչպես արդեն տեղեկացրել էինք, Երևանի ավագանու «Բարև Երևան» խմբակցությունը հրաժարվել էր քաղաքապետարանի տրամադրած ավտոմեքենայից: Այսօր խմբակցության ղեկավար Անահիտ Բախշյանը նամակ է ուղարկել քաղաքապետ Տարոն Մարգարյանին՝ հետևյալ բովանդակությամբ.
«Հարգելի պարոն Մարգարյան,
Խնդրում եմ տրամադրել գրավոր տեղեկություն այն մասին, թե քաղաքապետարանի ենթակայության ներքո գտնվող բոլոր ստորաբաժանումներին ընդհանուր առմամբ քանի ծառայողական ավտոմեքենա է տրամադրված, այդ մեքենաների մակնիշները և դրանց արժեքը (որքանո՞վ և ե՞րբ է քաղաքապետարանը դրանք ձեռք բերել), ինչպես նաև՝ թե տարեկան կտրվածքով որքան գումար է ծախսում քաղաքապետարանը դրանց տեխնիկական սպասարկման և վառելիքի համար:
Հիշեցնենք, որ «Բարև Երևան» դաշինքը Երևանի քաղաքապետարանից պահանջում է այլ մեքենա տրամադրել ավագանու իրենց խմբակցությանը:
Խմբակցության քարտուղար Անահիտ Բախշյանը օրերս հայտարարել էր, թե հրաժարվում են իրենց հատկացված «ԳԱԶ-3110» մակնիշի ավտոմեքենայից, քանի որ այն տեխնիկապես մաշված է և չգործող: Ըստ Բախշյանի, քաղաքային իշխանությունները ընդգծված խտրական վերաբերմունք են ցուցաբերել` ավագանու մյուս խմբակցություններին` Հանրապետականին և «Բարգավաճ Հայաստան»-ին տրամադրելով Hyundai Sonata մակնիշի մեքենաներ` «շքեղ, սիրուն, կարգին, սարքին»:
Վիրավորական վերաբերմունքից բացի, «Բարև Երևան»-ում սա համարում են նաև փորձեր` ամեն կերպ խոչընդոտելու ընդդիմության գործունեությունը:
