Թուրքական Anadolu լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն հայտարարել է, որ «Քրդստանի աշխատավորական» կուսակցության (PKK) զինյալներին աջակցող պատգամավորները կզրկվեն պատգամավորական անձեռնմխելիությունից:
«Թուրքիայի խորհրդարանում տեղ նախատեսված չէ նրանց համար, ովքեր քաղաքական աջակցություն են ցուցաբերում ահաբեկիչներին»,- ասել է Դավութօղլուն և քննադատել է քրդամետ «Ժողովուրդների դեմոկրատական» կուսակցության (ԺԴԿ) պատգամավորներին՝ հայտարարելով, թե «նրանք կապված չեն այս հողերի հետ»:
Թուրքիայի խորհրդարանի՝ սահմանադրության հարցերով հանձնաժողովը երեկ կողմ է քվեարկել մի շարք պատգամավորների անձեռնմխելիությունից զրկելուն: Այդ նպատակով պետք է անվավեր ճանաչվի 83-րդ հոդվածը, որն անձեռնմխելիություն է ապահովում պատգամավորներին:
