«Քառօրյա պատերազմից հետո և ռուսական կողմի արձագանքներից հետո մենք պետք է վերատեսության ենթարկենք և մեր ռազմավարական դաշնակցից պահանջենք շատ ավելի հստակ վերաբերմունք»,- «Առաջին լրատվական»- ի հետ զրույցում ասաց ԱԺ ՀՅԴ կուսակցության քարտուղար Աղվան Վադանյանը:
Խաչատուր Քոքոբելյանի կողմից ԵՏՄ անդամակցությունը դադարեցնելու վերաբերյալ նախագիծ ներկայացնելը, Աղվան Վարդանյանի գնահատմամբ, ճիշտ մոտեցում չէ, և նման խնդիրների պարագայում անհրաժեշտ է, որ քննարկումներ լինեն քաղաքական ուժերի հետ. «Ես միշտ դեմ եմ եղել հապճեպ, միանձնյա առաջարկություններին, որոնք սովորաբար հեռանկար չեն ունենում»:
Աղվան Վարդանյանի կարծիքով՝ չի կարելի միանգամից երկու հարց խառնել իրար և տնտեսական հարաբերությունները խառնել այսօրվա պատերազմական իրավիճակից բխող քայլերի հետ. «Այն, որ մենք պահանջ ունենք, որ շատ ավելի մեծ ակնկալիք ունենք մեր ռազմավարական գործընկերոջից՝ ՀԱՊԿ-ի շրջանակներում և ընդհանրապես Ղարաբաղյան հակամարտության կարգավորման հարցերում, ակնհայտ է, բայց շփոթել մեկը մյուսի հետ տեղին չէ»:
Ըստ Ա. Վարդանյանի՝ ակնկալել, որ ինչ-որ մի փուլում որևէ հարևան, որևէ գործընկեր զուտ մեր շահերն է պահելու, հարյուրամյա միամտություն է: Նրա խոսքով՝ մեր պայմանագրային պահանջները հստակեցենելով և խստացնելով հանդերձ՝ մենք պետք է զբաղվենք մեր ներսը կարգի բերելով և մեր բանակի սպառազինության արդիականությունը ցանկացած գնով ապահովելով»:
Իշխանության, քաղաքական ուժերի, օլիգարխների դասը, ըստ ՀՅԴ խմբակցության քարտուղարի, պետք է լինի տնայնագործությունից դուրս գալը և ամեն ինչ անելը պետականության ուժեղացման, բանակի ուժեղացման և սպառազինության համար: Նա նշեց, որ անընդհատ չի կարելի հույս դնել զուտ ազգային հոգեկերտվածքի, հայրենիքին նվիրվածության վրա. «Պետք է հասարակությունը տեսնի վերաբերմունքի փոփոխություն, այնպիսի բարեփոխումներ պետք է արվեն, որ ժողովուրդը տեսնի, որ իր մասին մտածող կա»:
Մանրամասները՝ տեսանյութում:
