Ռուսաստանի նախագահ Վլադիմիր Պուտինի և ԱՄՆ նախագահի թեկնածու Դոնալդ Թրամփի միջև բրոմանսը ավարտվել է՝ գրում է The Washington Post-ը:
Պարբերականը հիշեցնում է, որ մի քանի ամիս առաջ Թրամփն ու Պուտինը մի քանի անգամ դրական արտահայտություններ են փոխանցել միմյանց հասցեի: Այդպիսով նրանց միջև սկսվել է բրոմանս՝ երկու տղամարդու սերտ ընկերական հարաբերություններ:
Սակայն Թրամփի վերջին արարքը կարող է վերջ դնել նրանց ընկերությանը: Միլիարդատիրոջ ինսթագրամյան էջում հայտնվել է տեսանյութ, որում Պուտինը հանդես է գալիս որպես չարագործ: Հոլովակը հատված է այն տեսանյութից, որում Պուտինը պատկերված է ձյուդոյի մարտում մրցակցին մեջքի վրա տապալելիս, որից հետո հայտնվում է իսլամիստ ահաբեկիչ՝ դիմակով: Այնուհետև հոլովակում պատկերված է ԱՄՆ նախկին պետքարտուղար Հիլարի Քլինթոնը՝ հաչելիս, հետո Պուտինը ծիծաղում է:
Կրեմլը չի գնահատել Թրամփի կատակը՝ գրում է թերթը: Պուտինի մամլո քարտուղար Դմիտրի Պեսկովն արդեն բացասաբար է արտահայտվել հոլովակի մասին. «Մեզ մոտ ոչ ոքի համար գաղտնի չէ, որ, ասենք, այնտեղ Ռուսաստանի և նրա հետ կապված ամեն ինչի հրեշավորումը, ցավոք, ամերիկյան նախընտրական արշավի պարտադիր ատրիբուտ է»:
Այդպիսով Թրամփը, ըստ ամենայնի, կորցրել է Վլադիմիր Պուտինի աջակցությունը՝ եզրափակում է պարբերականը:
