Կուսակցություն ստեղծելու մասին հայտարարած նախկին արտգործնախարար, ԲՀԿ նախկին անդամ, պատգամավոր Վարդան Օսկանյանը պատասխանելով Ռոբերտ Քոչարյանի հետ կապի մասին հարցերին՝ հայտարարել էր, որ Քոչարյանի հետ կուսակցությունը կապ չունի, սակայն ինքն աշխատել է նրա հետ, աշխատանքը եղել է արդյունավետ և ընդհանրապես կողմ չէ սևացնելուն, քանի որ այսօրվա տնտեսական վիճակի համեմատ իրավիճակը այն ժամանակ եղել է շատ բարվոք:
Սրան պատասխանել է ՀՀԿ-ի խոսնակ Էդուարդ Շարմազանովը՝ հայտարարելով, որ Օսկանյանը թող չմոռանա, որ այդ ժամանակ իշխանական մեծամասնությունը ևս եղել է ՀՀԿ-ինն ու ՀՀԿ-ական է եղել վարչապետը: Շարմազանովն ասել է, որ թե՛ դրականի, թե՛ բացասականի համար պատասխանատուն ՀՀԿ-ն է:
Իսկապես հետաքրքրական իրավիճակ է ստեղծվում, նույնիսկ զավեշտալի՝ կարելի է ասել, եթե, իհարկե, խոսքը չվերաբերեր պետության ճակատագրին: Խնդիրն այն է, որ երևի թե միայն Հայաստանի պես երկրում երկու քաղաքական գործիչներ կամ ուժեր կարող են բանավիճել, ըստ էության, պետական հանցագործության համար պատասխանատվություն ստանձնելու համար:
Բանն այն է, որ Հայաստանի իշխող համակարգը իր գործունեության որևէ փուլում՝ անկախության առաջին իսկ տարիներից մինչև այսօր, ըստ էության գոյատևել է Հայաստանի հանրային և պետական ռեսուրսների հաշվին, ապահովելով մարդկանց մի խմբի իշխանություն և հարստություն, կեղծելով ընտրություններն ու արգելակելով երկրի զարգացումը: Եվ ահա այսօր այդ համակարգի երկու ներկայացուցիչներ, կապ չունի նախկին, թե ներկա, ըստ էության բանավիճում են և վիճարկում են այդ ամենի որևէ դրվագի համար պատասխանատվությունը:
Միգուցե նրանց համար մեծ պատիվ է լինել պետության դեմ կատարված գործողությունների գլխավոր պատասխանատուն, սակայն, ինչ խոսք, երկու ուժերը՝ հինն ու նորաստեղծը, շատ իզուր են բանավիճում: Այս տարիների ընթացքում իշխանական համակարգը պետության դեմ այնքան բան է արել, որի համար պատասխանատվությունը բոլորին լիուլի կբավականացնի:
