ՀԺԿ-ն կհամագործակցի բոլոր ընդդիմադիր ուժերի հետ, եթե հստակություն լինի: Այսօր լրագրողների հետ հանդիպման ժամանակ այս մասին ասաց ՀԺԿ նախագահ Ստեփան Դեմիրճյանը՝ խոսելով ներքաղաքական զարգացումների շուրջ:
Նա նշեց, որ համագործակցում են և պատրաստ են համագործակցել թե՛ ՀԱԿ կուսակցության, թե՛ ՀԱԿ դաշինքի մեջ մտած մյուս կուսակցությունների հետ: «Իհարկե, որոշակի խառնաշփոթ առաջացել է, սակայն մենք պատրաստ ենք համագործակցել թե ՀԱԿ դաշինքի, թե ՀԱԿ-ի հետ: Ֆորմալ առումով ՀԱԿ դաշինքը կա, խմբակցությունը ներկայացնում է ՀԱԿ դաշինքը, բայց փաստացի դաշինքը չի գործում: Դաշինքի մաս կազմող կուսակցություններից որոշները որոշել են պահպանել, ժամանակը ցույց կտա, թե ինչ կլինի։ Մենք պատրաստ ենք համագործակցել»,- նշեց Ստեփան Դեմիրճյանը: Նա հստակեցրեց, որ նոր ՀՀՇ-ի մասին կխոսի, երբ այն ստեղծվի:
Հարցին՝ ինչու չի մասնակցել Ծառուկյանի հովանավորությամբ կառուցված Սուրբ Հովհաննես Մկրտիչ եկեղեցու բացման արարողությանը՝ բանախոսը պատասխանեց, որ ներկա չի եղել տեխնիկական, որոշակի առողջական խնդիրների պատճառով: Նա նշեց, թե չի կարծում, որ դա քաղաքական էլիտայի համերաշխությանն ուղղված միջոցառում էր:
Անդրադառնալով ԲՀԿ-ի ընդդիմություն դառնալու մասին Գագիկ Ծառուկյանի հայտնի հայտարարությանը, Ս. Դեմիրճյանն ասաց, որ իր համար որևէ նոր բան չի ասվել: «Սենսացիոն բան չկա, ի վերջո՝ երբ էր հայտարարել, թե ընդդիմություն է: ՀԱԿ-ի տեսակետների հետ կապված հարցերը խնդրում եմ ուղղել ՀԱԿ-ին: Ես ՀԺԿ-ի անունից եմ խոսում: Խոսում եմ համագործակցության մասին: ԲՀԿ-ի հետ համագործակցություն կա ԱԺ-ում, երբ հստակ ընդդիմադիր ուժ լինի, կհամագործակցենք մենք ԲՀԿ-ի հետ»,- ասաց Ստեփան Դեմիրճյանը:
Հարցին, թե իր կարծիքով՝ այսօր ԲՀԿ-ն ընդդիմությո՞ւն է, օրինակ՝ Լևոն Զուրաբյանը պնդում է, որ ընդդիմություն է, բանախոսը պատասխանեց. «Եթե ԲՀԿ-ն չի հայտարարել, թե ընդդիմություն է, ինչո՞ւ եք այդ հարցն ինձ տալիս: ԲՀԿ-ն հայտարարություն է անելու առաջիկա օրերին, ամեն ինչ պարզ կդառնա»:
