Թուրքական Cumhuriyet թերթի փոխանցմամբ, Freedom House-ի «Մամլո ազատություն 2011» զեկույցում նշված է, որ Թուրքիայում հետընթաց է ապրել մամլո ազատությունը: 196 երկրների շարքում Թուրքիան 54 միավորով հանգրվանել է 112-րդ տեղում և դասվել է «մասնակի ազատ» երկրների շարքը: Դրանց թվում են նաև Եգիպտոսը, Հոնդուրասը, Հունգարիան, Մեքսիկան, Հարավային Կորեան, Թաիլանդը, Ուկրաինան և այլն:
Թուրքիայում դարձյալ քննադատության են ենթարկվել քրեական օրենսգրքի տխրահռչակ 301-րդ և 216-րդ հոդվածները, որոնք շարունակում են սպառնալիք հանդիսանալ թուրք լրագրողների համար:
Ընդհանուր առմամբ, 196 երկրներից միայն 68-ն (35 տոկոս) են նշվել որպես «ազատ», 65-ը` (33 տոկոս) «մասնակի ազատ», իսկ 63-ը` (32 տոկոս) «անազատ»:
Հիշեցնենք, որ մարտի կեսերին Freedom House-ը նշեց, որ Թուրքիայում մեծ թափ են հավաքել լրագրողների ձերբակալությունները` ասելով, որ թուրքական բանտերում պահվում են ընդհանուր առմամբ 50 լրագրողներ, որով Թուրքիան հայտնվել է աշխարհի «առաջատարների» շարքում:
