«Հանուն օրենքի» հասարակական շարժումը դատապարտում է «Զվարթնոց» օդանավակայանի հին մասնաշենքի ապամոնտաժման որոշումը: Այսօր՝ փետրվարի 10-ին՝ ժամը 12:00-ին «Չեք քանդելու. Փրկենք Զվարթնոցը» նախաձեռնությունը քննարկում կանցկացնի ֆեյսբուքում:
Նախաձեռնությունը հայտարարությամբ է հանդես եկել, որում մասնավորապես ասվում է. «Կոչ ենք անում հայ հասարակությանը միասնական լինել և տեր կանգնել Հայաստանի պատմամշակութային արժեքներին:
1974թ․ կառուցված «Զվարթնոց» օդանավակայանը՝ հայ ժողովրդի կողմից ճանաչված որպես Հայաստանի խորհրդանիշ, իսկ միջազգային հանրության կողմից գնահատված որպես խորհրդային մոդեռնիզմի եզակի նմուշ, այսօր գտնվում է քանդման եզրին:
Երևանի քաղաքապետարանը 2015թ․ դեկտեմբերին ապամոնտաժման թույլտվություն է տրամադրել «Արմենիա» Միջազգային Օդանավակայաններ» ՓԲԸ-ին` «Զվարթնոց» օդանավակայանի կլոր մասնաշենքի մասնակի ապամոնտաժման համար։
2012թ․ դեկտեմբերին Վիեննայի 19-րդ Ճարտարապետական կոնգրեսի շրջանակներում ընդունվել էր բանաձև, որով կոչ էր արվել ՀՀ կառավարությանը` պահպանել, առանց ձևափոխությունների վերականգնել և պատմական հուշարձանների շարքում ընդգրկել խորհրդային մոդեռնիզմի նմուշները, այդ թվում` «Զվարթնոց» օդանավակայանի կլոր ուղևորային համալիրը։
2013թ․ նոյեմբերի 11-ին ՀՀ Նախագահին կից Հանրային խորհուրդը մերժել էր «Զվարթնոց» օդանավակայանի ուղևորային հին համալիրի (կլոր շենք) քանդման վերաբերյալ «Արմենիա» Միջազգային Օդանավակայաններ» ՓԲԸ-ի առաջարկը և այդ շինության պահպանման խնդրանքով դիմել էր ՀՀ կառավարությանը։ Իսկ 2015թ․ հոկտեմբերի 15-ին, ՀՀ սփյուռքի նախարարության և ՀՀ քաղաքաշինության նախարարության աջակցությամբ, Ճարտարապետների համահայկական 3-րդ համաժողովը կոչով դիմել էր ՀՀ իշխանություններին` ճանաչել այդ շինության արժեքը և ապահովել դրա պահպանումը ապագա սերունդների համար:
Մասնավորի ձեռքում գտնվող նոր կառույցը՝ սեփական օդանավակայանը, մեծ վտանգ է պարունակում ժողովրդի համար: Ցանկացած րոպե այն կարող է փակվել, կարող է վերավաճառվել և այդ դեպքում Հայաստանը չի ունենա հնարավորություն դուրս գալ շրջափակումից և միակ տարբերակը մնում է հին օդանավակայանը: Այս առումով որևէ քանդման աշխատանք, որևէ պնդում հին օդանավակայանի քանդման հետ կապված, ԸՆԴՈՒՆԵԼԻ ՉԷ»:
