MK-Turkey-ի փոխանցմամբ՝ Գերմանիայի կառավարության մամլո քարտուղար Շտեֆան Զայբերտը հայտարարել է, որ Գերմանիայի կանցլեր Անգելա Մերկելը հաջորդ շաբաթ կայցելի Անկարա։
Զայբերտի խոսքերով՝ Մերկելը հանդիպելու է Թուրքիայի վարչապետ Ահմեթ Դավութօղլուի հետ՝ քննարկելու համար Եվրոպա ներգաղթյալների հոսքի կրճատման հարցը։
Ընդգծվում է, որ դա կլինի վերջին մի քանի ամսում Մերկելի երկրորդ այցը Թուրքիա։ Մերկելը նախորդ անգամ Թուրքիա է այցելել հոկտեմբերի 18-ին, որի ժամանակ քննարկել է փախստականների շուրջ ճգնաժամը։ Մերկելը Դավութօղլուի հետ հանդիպել է նաև հունվարի 22-ին Բեռլինում տեղի ունեցած միջկառավարական բանակցություններում։
Զայբերտի խոսքերով՝ Մերկելի առաջիկա այցի վերաբերյալ պայմանավորվածությունը ձեռք է բերվել Լոնդոնում անցկացված Սիրիայի հարցով դոնոր երկրների կոնֆերանսում, որին մասնակցել են Մերկելն ու Դավութօղլուն։