«Նոր ժամանակներ» կուսակցության նախագահ Արամ Կարապետյանն «Առաջին լրատվական»-ի հետ զրույցում անդրադարձավ Հայաստանի երկրորդ նախագահ Ռոբերտ Քոչարյանի՝ Ռուսաստանի դատախազությունում հայտնվելուն: Նրա կարծիքով՝ այդ ամենը շարունակություն չի ունենա, քանի որ ավելի շատ նման է սեփական PR քայլն անելուն. «Ես կարծում եմ, որ դրանք ավելի շատ ներկլանային խնդիրներ են, քան ինչ-որ գործընթացներ, և ես չեմ կարծում, թե այդ գործընթացները կարող են իրենց շարունակությունն ունենալ Ռուսաստանում կամ այստեղ»:
Մեր այն հարցին, թե համաձա՞յն է արդյոք այն կարծիքների հետ, որ Հայաստանի ներքին հարցերը պետք է քննվեն Հայաստանում, այլ ոչ թե Ռուսաստանում, Ա. Կարապետյանը պատասխանեց. «Ես կարծում եմ, որ յուրաքանչյուր հանցագործություն, որն իր մեջ ներառում է ոչ միայն մեր, այլ նաև արտաքին հարցեր, պետք է քննվի նաև արտաքին դաշտում, ես խնդիր չեմ տեսնում այդտեղ: Եթե կա արտաքին գործընթաց, որը քրեորեն կապված է ինչ-որ ձև Ռուսաստանի գործունեության, կամ Ռուսաստանում մարդկանց գործունեության հետ, դա պետք է քննվի այնտեղ ևս, ես այստեղ խնդիր չեմ տեսնում»:
Ա. Կարապետյանը նաև նշեց, որ տիրապետելով ինֆորմացիային և ծանոթ լինելով գործին` կարծում է, թե սա պարզապես առանձին մարդկանց PR քայլեր են. «Այո, եթե կա խնդիր, եթե կա կոռուպցիայի խնդիր, դրանք պետք է քննվեն, բայց հիմա այդ հարցը լուծվող չէ։ Ուզում են Վենեսուելա, ուզում են Կիպրոս տանել հարցը՝ դրանով ոչինչ չի փոխվի»:
Այն հարցին, թե երբ կամ ինչպես պետք է լուծվի ընտրական գործընթացի հանդեպ անվստահության հարցը, կամ ինչ անել, որ մեքենայությունների մեջ ներգրավված քաղաքական գործիչները պատասխանատվության ենթարկվեն, ՆԺԿ նախագահը պատասխանեց. «Հեղափոխությամբ։ Պետք է մոռանալ ամեն ինչը և հասկանալ, որ Հայաստանում իրավիճակը կարող է փոխվել միայն հեղափոխությամբ»:
Հիշեցնենք, որ ՀՀ երկրորդ նախագահ Ռոբերտ Քոչարյանի ֆինանսական մեքենայությունների, կոռուպցիոն գործարքների մասին փաստերը հայտնվել են ՌԴ նախագահ Վլադիմիր Պուտինի սեղանին: ՌԴ «Կոռուպցիայի դեմ պայքարի » ՀԿ-ն արդեն սկսել է նրա՝ ֆինանսական մեքենայությունների և անօրինական գործարքների մասին փաստող նյութերն ուղարկել ՌԴ համապատասխան մարմիններին, այդ թվում՝ այդ երկրի նախագահ Պուտինին: Փաստաթղթերի մի մասի արդյունքում Ռուսաստանի Դաշնության գլխավոր դատախազության վարույթում հայտնվել է մի գործ, որը կապ ունի հենց Ռոբերտ Քոչարյանի անվան հետ: Ռուսաստանի ՀԿ-ն նաև նամակ էր հղել Վլադիմիր Պուտինին՝ տեղեկացնելով, որ իրենց մոտ Հայաստանից ուղարկվել են փաստաթղթեր, որոնցում ներկայացված են փաստեր՝ խոշոր բիզնեսում ՀՀ նախկին նախագահի պաշտոնավարման ժամանակահատվածում Ռոբերտ Քոչարյանի մասնակցության վերաբերյալ: Կրեմլից փաստաթղթերը հասցեագրվել են Գլխավոր դատախազությանը:
