Ֆրանսիական «Պարի Սեն Ժերմեն»-ի բրազիլացի պաշտպան Դավիդ Լուիսը պնդում է, որ չի ցանկանում վերադառնալ Փարիզ, որտեղ «Իսլամական պետություն» հանցավոր խմբավորումը նոյեմբերի 13-ին իրականացրել է մի քանի ահաբեկչական գործողություն, որի արդյունքում զոհվել է շուրջ 130 մարդ:
Լուիսն այժմ Բրազիլիայում է և պատրաստվում է Պերուի հավաքականի հետ երեքշաբթի կայանալիք հանդիպմանը: Այս մասին գրում է բրիտանական «Daily Mail»-ը:
ՊՍԺ-ի պաշտպանը, որի իրավունքների համար ֆրանսիական ակումբը 50 միլիոն ֆունտ է վճարել Լոնդոնի «Չելսի»-ին, անհանգստանում է իր ընտանիքի ու ընկերների անվտանգության համար:
«Ես Փարիզում ունեմ ընկերուհի ու մի քանի ընկերներ, որոնք շատ տխուր են ու վախեցած,- հայտարարել է բրազիլացի ֆուտբոլիստը: – Ես չգիտեմ՝ ինչ եմ անելու, արդյոք վերադառնալո՞ւ եմ Փարիզ: ՊՍԺ-ում հանդես գալն իմ աշխատանքն է, սակայն եթե ինձնով պայմանավորված լիներ, անկեղծ ասում եմ՝ չէի վերադառնա»:
Նշենք, որ Դավիդ Լուիսը երեխաներ չունի, սակայն երկար ժամանակ է՝ հանդիպում է պորտուգալուհի Սարա Մադեիրայի հետ:
ՊՍԺ-ն իր հաջորդ հանդիպումն անցկացնելու է նոյեմբերի 21-ին՝ հաջորդ շաբաթ օրը: Ֆրանսիական թիմի մրցակիցն է «Լորիեն»-ը:
Հավելենք նաև, որ թիմի ուրուգվայցի հարձակվող Էդինսոն Կավանին ևս խանդավառությամբ չի ընդունում այն, որ պետք է վերադառնա Փարիզ նման իրադարձություններից հետո:
