Ինդոնեզիայում վերջին 5 ամսում հրդեհները մոխիր են դարձրել արդեն ավելի քան 2 մլն հա անտառ: TASS-ի հաղորդմամբ՝ նոյեմբերի 3-ին այսպիսի տվյալներ է հրապարակել Ազգային տիեզերական և ավիացիոն գործակալությունը:
«Մենք համեմատել ենք արբանյակներով արված լուսանկարները հրդեհներից առաջ և հետո: Մենք տվյալները թարմացնում ենք յուրաքանչյուր 10 օրը մեկ, այնպես որ՝ մոխրացած հողերի տարածքը կավելանա»,- հայտնել է գերատեսչության պաշտոնական ներկայացուցիչ Փարվաթի Սոֆանը: Նրա տեղեկությամբ՝ աղետից առավելապես տուժել են Նոր Գվինեա, Սումատրա և Կալիմանտան կղզիները:
Ինդոնեզիայում ուժեղագույն անտառային հրդեհները արդեն խլել են 24 տեղի բնակչի կյանք, նաև ծխով են պատել երկրի, Սինգապուրի, Մալայզիայի, Թաիլանդի մի շարք շրջաններ: Երկրի իշխանությունները ստիպված են եղել դիմել այլ պետությունների օգնությանը:
