Ստամբուլի հայկական «Ակօս» թերթի փոխանցմամբ՝ քրդամետ «Ժողովուրդների դեմոկրատական» կուսակցությունը (ԺԴԿ) նոյեմբերի 1-ի արտահերթ խորհրդարանական ընտրությունների արդյունքներով կորցրել է մոտ 1 միլիոն քվե, ինչը երեկվա ընտրությունների անակնկալներից մեկն է։
Ոչ պաշտոնական տվյալներով՝ ԺԴԿ-ն նոյեմբերի 1-ի ընտրությունների արդյունքներով հավաքել է քվեների 10.71 տոկոսը՝ 5.084.667 քվե, որով խորհրդարանում ստանալու է 59 մանդատ։ Մինչդեռ հունիսի 7-ի ընտրություններում հավաքել էր քվեների 13.01 տոկոսը՝ 6.056.811 քվե, և խորհրդարանում ներկայացված էր 80 պատգամավորով։ Սա նշանակում է, որ երեկվա ընտրություններում ԺԴԿ-ի քվեները պակասել են 1 միլիոնով։
ԺԴԿ-ն Ստամբուլում կորցրել է միանգամից 4 պատգամավոր։ Բացի դրանից՝ այն պատգամավորների թվի նահանջ է ունեցել Ադանայի, Դերսիմի, Կարսի, Իգդիրի, Աղրըի, Վանի, Դիարբեքիրի, Մարդինի, Ուրֆայի, Գազիանթեփի, Ադանայի նահանգներում։
Միևնույն ժամանակ ԺԴԿ-ն չի կարողացել պատգամավորական մեկ մանդատ ձեռք բերել Բուրսայի, Քոջայելիի, Էրզրումի և Արդահանի նահանգներում, ինչը նրան հաջողվել էր հունիսի 7-ի ընտրությունների արդյունքներով։ Ի տարբերություն հունիսի 7-ի ընտրությունների՝ ԺԴԿ-ն այս անգամ չի հաղթել Կարսի և Արդահանի նահանգներում՝ զիջելով «Արդարություն և զարգացում» կուսակցությանը (ԱԶԿ)։
