Ճապոնիայի մայրաքաղաքի գլխավոր ցուցասրահներից մեկում՝ Big Sight-ում, չորեքշաբթի բացվում է 44-րդ Tokyo Motor Show-2015 ավտոսրահը: Այս մասին հայտնում է TASS-ը: Ավելի քան 30 առաջատար ճապոնական և արտասահմանյան ավտոարտադրողներ այնտեղ կներկայացնեն վերջին ձեռքբերումները:
Սպասվում է, որ Ճապոնիայի ավտոհսկա Toyota Motor Corp-ն ավտոսրահում կներկայացնի նոր սպորտային կոնցեպտ-քար, որը կտարբերվի փոքր չափով և բարձր կառավարելիությամբ:
Toyota-ն կներկայացնի նաև իր նոր կոնցեպտ-քարը վառելիքային մարտկոցներով: Համանման մեքենա կներկայացնի նաև Honda Motor Co-ն, որը նույնպես պետք է նոր ավտոմեքենա ցուցադրի իր սպորտային NSX հավաքածուից: Mazda-ն կներկայացնի նոր սպորտային մեքենա և կոնցեպտ-քար: Suzuki Motor Corp-ը կներկայանա իր սուբկոմպակտ Ignis-ի նորացված տարբերակով:
Ցուցահանդեսի ամենաինտրիգային նմուշներից մեկը խոստանում է լինել Nissan կոնցեպտ-քարը՝ Teatro for Dayz անվանումով, որի դիզայնը կարող է որոշել վարորդը իր ընտրությամբ:
Tokyo Motor Show-ն արդեն մոտ կես դար անցկացվում է 2 տարին մեկ: Առաջին այդպիսի ավտոսրահը Ճապոնիայի մայրաքաղաքում բացվել է 1954թ.:
