Շենգավիթ վարչական շրջանի ընդհանուր իրավասության դատարանում Դավիթ Բալայանի նախագահությամբ ընթանում է Արթուր Ս.-ի և Հովհաննես Գ.-ի գործի դատական քննությունը:
Արարատի մարզի բնակիչներ, 24-ամյա Արթուրը և 27-ամյա Հովհաննեսը մեղադրվում են խմբի կազմում կատարած խուլիգանության համար՝ ՀՀ քրեական օրենսգրքի 258 հոդվածի 3-րդ մասի 1-ին կետով:
Ըստ մեղադրանքի՝ 2014 թվականի հոկտեմբերի 26-ին, գիշերվա ժամը 1-ի սահմաններում երիտասարդներն այցելել են Նորագավիթում գործող «Միրաժ» գիշերային ակումբ՝ զվարճանալու:
Գտնվելով ոգելից խմիչքի ազդեցության տակ՝ նրանք իրենց սեղանի մոտ են հրավիրել ակումբի պարուհիներին, բայց, ըստ մեղադրանքի, «համապատասխան գումար վճարելու փոխարեն» Արթուրը քաշքշել է պարուհիների ներքնաշորերից, պահանջել է, որ նրանք մերկանան, որպեսզի լիակատար լինի «միրաժի» զգացողությունը:
Պարուհիները մերժել են, չեն մերկացել: Արթուրը զայրացել ու հայհոյել է նրանց:
Հետո տղաների «թիրախում» հայտնվել է ակումբի մատուցողուհին, ով նրանց առաջարկել է հարևան սեղանից տեղափոխվել իրենց սեղանի մոտ ու չաղմկել:
Ցավագին ընդունելով մատուցողուհու առաջարկը՝ Արթուրն ու Հովհաննեսը, ըստ մեղադրանքի, հայհոյել են նաև մատուցողուհու, ապա՝ նրանց կարգի հրավիրելու համար մոտեցած մենեջերուհու հասցեին, ինչպես նաև հայհոյել են անհասցե՝ «իրենց հաճույքի համար»:
Հովհաննեսը, շարունակելով խուլիգանական գործողությունները, բաժակ է նետել մատուցողուհու հետևից: Բաժակը ջարդվել է:
Երկու հաճախորդների բարձրացրած աղմուկի պատճառով ակումբի մնացած հաճախորդները հեռացել են, ակումբի աշխատանքը դադարեցվել է ժամանակից շուտ:
Բայց Արթուրի ու Հովհաննեսի «ելույթը» չի ավարտվել: Բանն այն է, որ նրանք նախապես, գումար չունենալու պատճառով, ակումբում «գրավ էին դրել» բջջային հեռախոս:
Արթուրը չի ցանկացել հեռախոսը թողնել ակումբում, առաջարկել է հեռախոսը փոխարինել ժամացույցով: Սկզբում նա այդ առաջարկն արել է ակումբի մենեջերուհուն, իսկ երբ նա չի համաձայնել՝ ակումբի սեփականատիրոջ որդուն՝ Գարիկին:
Արթուրի առաջարկը կտրականապես չի ընդունվել: Նա ու Հովհաննեսը վիճաբանել են Գարիկի հետ, հայհոյել են նրան: Դրանով էլ չբավարարվելով՝ Արթուրը բռունցքով խփել է Գարիկի դեմքին, սեղմել է նրա պարանոցը՝ պատճառելով թեթև վնաս՝ առողջության կարճատև քայքայումով:
Նույն ժամանակ Գարիկին ձեռքերով ու ոտքերով հարվածներ է հասցրել նաև Հովհաննեսը:
Երբ գիշերային «ելույթի» համար խուլիգանության մեղադրանք է առաջադրվել Արթուրին ու Հովհաննեսին, նրանք հասկացել են, որ «Միրաժում» կատարվածը միրաժ չի եղել, այլ՝ իրական իրարանցում, որի համար ստիպված են լինելու պատասխանատվություն կրել:
Դատարանում Արթուրն ու Հովհաննեսն ընդունել են իրենց մեղքը, զղջացել են, հայտնել են, թե հարթել են պատճառված վնասը: Գործը քննվում է արագացված ընթացակարգով:
Ամբաստանյալները երկուսն էլ բնութագրվում են դրական: Այն, որ «Միրաժում» գործողություններ կատարելու պահին եղել են ալկոհոլ օգտագործած վիճակում, հաստատվում է տուժողի, վկաների ցուցմունքներով, ինչպես նաև այդ օրը ակումբում կատարած նրանց պատվերի վերաբերյալ գրառումով: Նրանց պատվերը, մասնավորապես, գարեջրի մասով՝ գրանցվել է այսպես. «Կիլիկիա» գարեջուր՝ 1+1+1+1+1+1…
Մեղադրող դատախազը հանդես եկավ ճառով: Նա հաստատված գնահատեց ամբաստանյալներին մեղսագրված արարքը, որպես ծանրացնող հանգամանք՝ նշեց արարքները ալկոհոլ օգտագործած վիճակում կատարելը:
Դատախազը միջնորդեց Արթուրին ու Հովհաննեսին դատապարտել տուգանքի՝ յուրաքանչյուրին՝ 400 հազար դրամի չափով:
Ճառի համար խոսքը տրվեց գործով տուժողին, բայց վերջինս կտրուկ հայտարարեց, որ շատ վատ է զգում, ի վիճակի չէ որևէ բան ասելու:
Դատարանը տուժողի, ինչպես նաև ամբաստանյալների ու նրանց շահերի պաշտպանի ճառերը կունկնդրի հաջորդ նիստին:
