Սահմանադրության նախագծին խորհրդարանում դեմ քվեարկեցին ընդամենը 10 պատգամավորներ, որոնցից 6-ը ՀԱԿ խմբակցությունից էին, երկուսը՝ ՕԵԿ, մեկը՝ «Ժառանգությունից» և ևս մեկը՝ ԲՀԿ-ից: Ամենահետաքրքրականը հենց ԲՀԿ խմբակցության ներկայացուցիչների պահվածքն էր: 35-հոգանոց այդ խմբակցությունից, որը մինչև փետրվարի 12-ը դեմ էր արտահայտվում սահմանադրական փոփոխություններին միակ պատգամավորը, որ դեմ քվեարկեց փոփոխություններին՝ «Ալյանս» կուսակցության նախագահ Տիգրան Ուրիխանյանն էր:
Թեև ԲՀԿ-ն որոշում էր կայացրել կողմ քվեարկել Սահմանադրության նախագծին, սակայն կուսակցության նախագահ և խմբակցության ղեկավար Նաիրա Զոհրաբյանը բացակայում էր նիստից: Որքան էլ կուսակիցները վստահեցրին, որ Զոհրաբյանը բացակայում է հանրապետությունից, որևէ մեկը չհավատաց այդ մանկական պատճառաբանությանը: Ն. Զոհրաբյանը հավանաբար ամաչել է կողմ քվեարկել մի նախագծի, որի մասին մինչև փետրվարի 12-ը պնդում էր, որ այդ Սահմանադրությամբ ճանապարհ է բացվում նոր Հիտլերի իշխանության գալու համար: Ն. Զոհրաբյանը կարող է համարել, որ իրեն շատ հերոսաբար դրսևորեց կողմ չքվեարկելով Սահմանադրության նախագծին, և հիմա իրեն ոչ ոք չի կարող մեղադրել իր սկզբունքներին դավաճանելու համար, սակայն դա ավելի շատ «գողական» պահվածք է, քան քաղաքական, որովհետև եթե կուսակցությունը որոշել է կողմ քվեարկել, առաջին կողմը պետք է Զոհրաբյանը լիներ:
Քվեարկությանը չէր մասնակցում ԱԳ նախկին նախարար Վարդան Օսկանյանը, ով մինչ այդ գրել էր 10 պատճառ Սահմանադրության նախագծին դեմ լինելու համար: Բայց նույնիսկ այդ 10 պատճառների հանրագումարը նրան չստիպեց գալ խորհրդարան և դեմ քվեարկել նախագծին: Ինչ-որ մեկը կարող է ասել, որ չմասնակցելը արդեն «ոչ» է, բայց դա նույն չափով և առավել շատ «այո» է, որովհետև «ոչ» ասողը հստակ «ոչ» է քվեարկում: Եթե դու «ոչ»-ի համոզված կողմնակից ես, բայց «ոչ» չես քվեարկում, նշանակում է, ինչ-որ պատճառներ ունես քո դիրքորոշումը թաքցնելու համար:
Սահմանադրության նախագծին «ոչ» չքվեարկեց նաև ԲՀԿ անդամ Հայկ Խաչատրյանը, ով վերջերս մամուլում հայտարարել էր, որ ինքը դեմ է սահմանադրական փոփոխություններին և պատրաստվում է դեմ քվեարկել: Խաչատրյանին հավաստիացրել էին, որ մոտ ժամանակներիս ինչ-որ կտրուկ փոփոխություններ են լինելու երկրում, և այդ ազդեցության տակ Խաչատրյանը որոշել էր միանալ «ոչ»-ին, բայց չտեսնելով որևէ փոփոխություն՝ նա որոշել է տեր չկանգնել իր «ոչ»-ին:
Սահմանադրության նախագծի քվեարկությանը չմասնակցեցին ԲՀԿ խմբակցության անդամներ Լյովա Խաչատրյանը և Վահան Կարապետյանը: Նրանք երկուսն էլ ընդգծված ընդդիմադիր վարքագիծ ունեն, բայց լինելով գործարարներ՝ հավանաբար նպատակահարմար են գտել շատ չսրել հարաբերությունները իշխանության հետ:
Բայց ամենազարմանալին ԲՀԿ քոչարյանական թևի պահվածքն էր: Վահե Հովհաննիսյանը, Ստեփան Մարգարյանը և Էլինար Վարդանյանը պետք է որ «ոչ» քվեարկեին այս նախագծին: Հովհաննիսյանը նախապես հայտարարել էր, որ իր դիրքորոշումը չի փոխվել, որ ինքը համարում է, որ երկրում կան լուծում պահանջող այլ կարևոր խնդիրներ, և հիմա Սահմանադրությունը փոխելու ժամանակը չէ: Նկատենք, որ Վահե Հովհաննիսյանը որևէ խոսք չէր ասել այն մասին, որ այս նախագիծը ուղղված է իշխանության վերարտադրությանը, կամ որ դրա արդյունքում Հայաստանում հաստատվելու է միակուսակցական համակարգ: Վահե Հովհաննիսյանը բացակայում է Հայաստանից, դա դժվար չէ կազմակերպել, իսկ Էլինար Վարդանյանը և Ստեփան Մարգարյանը Սահմանադրության նախագծի քվեարկությունից հետո հայտարարեցին, որ իրենց դիրքորոշումը չի փոխվել: Մասնավորապես Էլինար Վարդանյանը իր ֆեյսբուքյան էջում գրել էր. «Սահմանադրական փոփոխությունների վերաբերյալ նախկինում արտահայտած իմ դիրքորոշումը մնում է անփոփոխ»:
Մենք փորձեցինք գտնել, թե երբ է Էլինար Վարդանյանը դիրքորոշում արտահայտել Սահմանադրական փոփոխությունների վերաբերյալ, և ընդհանրպես որն է նրա նախկինում արտահայտած դիրորոշումը, բայց այդպես էլ չգտանք նրա կողմից արտահայտված որևէ խոսք Սահմանադրության նախագծի վերաբերյալ: Խորհրդարանական լսումների, խորհրդարանում կազմակերպված քննարկումների ժամանակ այս եռյակի որևէ ներկայացուցիչ որևէ բառ չի արտասանել սահմանադրական փոփոխությունների վերաբերյալ, և այս իմաստով առավել տարօրինակ է, երբ նրանք հայտարարում են, որ իրենց դիրքորոշումը մնում է անփոփոխ: Գոնե մի բառով բնորոշեին իրենց դիրքորոշումը, գրեին, որ «բացասական դիրքորոշումը» չի փոխվել, բայց չէ, այնպես են գրել, որ հետո կարողանան ասել, որ իրենց դիրքորոշումը դրական է եղել, և այն այդպես դրական էլ մնացել է:
Սահմանադրական փոփոխությունների նախագծի քննարկմանը չմասնակցեց նաև ԲՀԿ նախկին նախագահ Գագիկ Ծառուկյանը, բայց նա ընդհանրապես ԱԺ նիստերին չի մասնակցում: Նա երեկ ավելի կարևոր գործով էր զբաղված՝ գնացել էր Արմավիրի մարզի Ամասիա գյուղ հանդիպելու իր դեմ բողոքող գյուղացիների հետ և քննարկելու խաղողի մթերման ընթացքը: Ծառուկյանը իրեն վեր է դասում Սահմանադրությունից, այլապես Սահմանադրությունը խախտելով՝ բացահայտ չէր զբաղվի գործարարությամբ, արհամարհելով խորհրդարանի նիստը: Բայց նրան ամեն ինչ ներելի է, որովհետև ԱԺ նախագահ Գալուստ Սահակյանը Ծառուկյանի բոլոր բացակայությունները հարգելի է ճանաչում:
Ինչ վերաբերում է ՕԵԿ-ին, ապա այդ կուսակցությունը իրեն պահեց «Օրինաց երկրի» պես: Խմբակցության երկու անդամներ դեմ քվեարկեցին նախագծին, երեքը՝ ձեռնահ: Այնպես որ, ասել, որ ՕԵԿ-ը դեմ է փոփոխություններին՝ չի կարելի, որովհետև խմբակցության մեծամասնությունը քվեարկեց ձեռնպահ: Եվ սա այն դեպքում, երբ այս կուսակցությունը մասնակցում էր Սահմանադրության նախագծի քննարկումներին, և նրանց որոշ առաջարկներ ընդունվել էին: Բայց ՕԵԿ-ը հստակ երաշխիքներ էր ուզում, որ կողմ քվեարկելու դիմաց իրենց կտրվի հանրապետության նախագահի պաշտոնը: Երևի նման երաշխիքների բացակայությունը ստիպեց Արթուր Բաղդասարյանի կուսակիցներին ընդդիմադիր պահվածք դրսևորել:
«Ժառանգություն» խմբակցության 3 անդամներից երկուսը կողմ քվեարկեցին նախագծին, և միայն Զարուհի Փոստանջյանն էր դեմ: Այս իմաստով էլ կարելի է արձանագրել, որ այս խմբակցությունը ավելի շատ կողմ էր Սահմանադրության նախագծին, քան դեմ էր:
Ի վերջո, խորհրդարանական 6 խմբակցություններից երեքը միանշանակ կողմ քվեարկեցին սահմանադրական փոփոխություններին, «Ժառանգությունը» ավելի շատ կողմ էր, քան դեմ, ՕԵԿ-ը ավելի շատ ձեռնպահ էր, քան դեմ, և միայն ՀԱԿ խմբակցությունն էր, որի 7 անդամներից 6-ը դեմ քվեարկեցին Սահմանադրության նախագծին, և միայն ՎՍԴՀԿ ատենապետ Լյուդմիլա Սարգսյանն էր, որ կողմ քվեարկեց:
