Թուրքական Milliyet թերթի փոխանցմամբ՝ Թուրքիայի նախագահ Ռեջեփ Էրդողանը լրագրողների հետ զրույցում հայտարարել է, որ Ռուսաստանը դեռ չի հստակեցրել Սիրիայի ճգնաժամի կարգավորման հանդեպ դիրքորոշումը։ Էրդողանի խոսքով՝ Ռուսաստանի աջակցությունը Սիրիայի իշխող վարչակարգին մտահոգում է Թուրքիային:
«Ռուսաստանն ու Իրանն այսօր բացահայտ աջակցում են սիրիական վարչակարգին։ Թուրքիան պահանջում է Սիրիայի տարածքում ստեղծել անվտանգության գոտի՝ այնտեղ սիրիացի փախստականներին տեղավորելու համար։ Ներկայում Թուրքիայում կա երկու միլիոն փախստական։
Մենք սիրիացի փախստականների վրա ծախսել ենք 7.5 միլիարդ եվրո, մինչդեռ այդ հարցում ստացված միջազգային օգնությունը կազմել է 420 միլիոն դոլար։ Սիրիացի փախստականների հարցը ոչ միայն Թուրքիայի, այլև մնացյալ աշխարհի հարցն է։ Սիրիայի ապագայում Ասադը չպետք է տեղ ունենա։ Նրա պատճառով երկրում զոհվել է 350.000 մարդ»,- ասել է Թուրքիայի նախագահը։
Էրդողանը հավելել է, որ ՄԱԿ ԳԱ-ի շրջանակներում տեղի է ունենալու ԱՄՆ-ի, Ռուսաստանի ու Թուրքիայի արտգործնախարարների եռակողմ հանդիպում, որի ժամանակ կքննարկվի Սիրիայի հարցը։ Էրդողանը հայտնել է, որ Պուտինի հետ քննարկել է նաև տնտեսական հարաբերություններին առնչվող և մշակութային հարցեր։
