Հռոմի պապի անձը մարդկանց հիշեցնում է Աստծո գթասրտության կոչի մասին: TASS-ի հաղորդմամբ՝ այս մասին Սպիտակ տանը Ֆրանցիսկոս պապի հանդիսավոր ընդունելության ժամանակ հայտարարել է ԱՄՆ նախագահ Բարաք Օբաման:
«Ինձ համար հսկայական պատիվ և արտոնություն է ամերիկացի ժողովրդի անունից Ձեզ Միացյալ Նահանգներում ողջունելը»,- ասել է Օբաման պապին ողջունելիս: Նա նշել է, որ ֆրանցիսկոսի այցը ցույց է տալիս, «որքան շատ են ցանկացած ծագման և հավատքի ամերիկացիները գնահատում դերը, որ խաղում է Կաթոլիկ եկեղեցին Ամերիկայի ամրապնդման գործում»:
Նա հիշեցրել է, որ այդ այցն ԱՄՆ Պապի համար առաջինն է: «Ձե՛րդ Սրբություն, Ձեր խոսքերով և արարքներով Դուք ցույց եք տալիս բացարձակ բարոյական օրինակ»,- ասել է ԱՄՆ նախագահը: Նրա խոսքով՝ Հռոմի պապը իր համեստությամբ, «իր խոսքերի նրբությամբ, իր ոգու ազնվությամբ ցույց է տալիս Հիսուսի ուսմունքի կենդանի օրինակ»:
«Դուք մեզ հիշեցնում եք, որ Աստծո գլխավոր ուղերձը գթասրտությունն է: Դա նշանակում է՝ անծանոթին դիմավորել կարեկցանքով և իսկապես բաց սրտով, բոլորին՝ սկսած փախստականից, որը լքել է պատերազմող երկիրը, մինչև ներգաղթյալ, որն իր տունը թողել է ավելի լավ կյանքի որոնումներով»,- ասել է Օբաման:
Նա Պապին շնորհակալություն է հայտնել ամերիկակուբայական հարաբերությունների նորմալացմանն աջակցելու համար:
«Մենք Ձեզ աջակցում ենք դավանանքի ազատությունը և միջկրոնական երկխոսությունը պաշտպանելու մտադրության մեջ»,- ասել է Օբաման Պապին:
