Դատաիրավական բարեփոխումների շուրջ երեկ հրավիրված խորհրդակցության ժամանակ Սերժ Սարգսյանը, անդրադառնալով 2008թ. մարտի 1-ի դեպքերի առիթով հարուցված քրեական գործի ընթացքին,ընդգծեց, որ այդ հարցն անձնապես իր համար «շատ կարևոր» է. «Ձեզ ուղղված իմ պահանջն է` կրկին և առավել մանրակրկիտ անդրադառնալ նույնիսկ այն հանգամանքներին, որտեղ, ըստ ձեզ, որևէ նոր բան չի կարող լինել: Փորձե՛ք այդ դեպքերի բացահայտման նոր ուղիներ գտնել: Արդեն տևական ժամանակ է անցել, գուցե մարդիկ կան, ովքեր ականատես են եղել և այն ժամանակ չէին ուզում համագործակցել իրավապահ մարմինների հետ, իսկ հիմա այլ մոտեցումներ ունեն: Սա էլ է շատ հնարավոր»:
«Առաջին լրատվականը» Մարտի 1-ի իրադարձությունները ուսումնասիրող Փաստահավաք խմբի ՀԱԿ ներկայացուցիչ Անդրանիկ Քոչարյանին հարց ուղղեց, թե ինչպետք է հետևի Ս.Սարգսյանի հայտարարությանը, ինչ քայլեր պետք է արվեն:
«Ե՛վ մեր հասարակությունը, և՛ այն մարդիկ, ովքեր մասնագիտական հմտություններ են ցուցաբերելու բավական աշխատանք տարել Մարտի 1-ի դեպքերը բացահայտելու ուղղությամբ, ուշադիր հետևելու են, որ իշխանությունների հայտարարությունները լինեն անկեղծ,և դրանցից բխեն գործողություններ` տեսանելի գործողություններ: Ճիշտ կլինի, որ սկսեն Ռոբերտ Քոչարյանից, որովհետև Ռ.Քոչարյանով է պայմանավորված եղել ամբողջ գործընթացը: Հետո սկսեն Հայկ Հարությունյանի նշած ինչ-որ շտաբի գործունեությունից, այդ շտաբի անդամները հայտնի է՝ ովքեր են եղել, ինչ որոշումներ են կայացրել: Ե՛վ ոստիկանությունում, և՛ ազգային անվտանգությունում, և՛նախաքննական մարմնի ձեռքին հսկայական նյութեր կան, որոնք պարզապես պետք է դառնան գործողությունների հիմք բացահայտումների հասնելու համար: Այսինքն` պետք է սկսել իրական բացահայտում:
Իսկ հայտարարություններ մենք շատ ենք լսել. մենք չենք մոռացել, որ Ս.Սարգսյանը ընտրվելուց հետո հայտարարեց, թե Մարտի 1-ի հետ կապված բոլոր մեղավորները` անկախ իրենց զբաղեցրած պաշտոնից, պետք է պատժվեն: Բայց պատժվեցին մարդիկ, որոնք Մարտի 1-ի հետ առնչություն են ունեցել այնքանով, որ իրենք եղել են ընդամենը հանրահավաքի մասնակիցներ»,- նշեց Անդրանիկ Քոչարյանը:
«Առաջին լրատվական»-ի հարցին` հնարավո՞ր է, որ Ս.Սարգսյանի այս հայտարարությունը մեղմի իշխանության և ընդդիմության միջև ջրբաժանի հաստատման հնարավորությունը,Անդրանիկ Քոչարյանը պատասխանեց. «Երեք պահանջ է ներկայացված իշխանություններին: Երեկվա հայտարարությունը` այո, որպես պահանջ կատարվել է,բայց այնտեղ կան ևս երկու պահանջներ, որոնք չեն կատարվել, ավելին` դրանցից մեկը արդեն ակնհայտորեն մերժվել է:
Երկրորդ պահանջը` քաղբանտարկյալների ազատ արձակումը, կատարված չէ: Տեսնենք՝ մինչև ապրիլի 28-ը իշխանությունները, ի վերջո, գնու՞մ են դրանց կատարմանը: Դրանք արդարացի պահանջներ են, դրանք պահանջներ են, որոնց չկատարման դեպքում իշխանությունները պարզապես չեն կարող բացատրել, թե ինչու չեն կատարում:
Ի վերջո, դրանք ոչ միայն մեր պահանջներն են, այլև միջազգային հանրության պահանջներն են: Այդ խնդիրները չլուծելով` որևէ ներքին խնդիր լուծել, բարեփոխումներ իրականացնելհնարավոր չէ: Իշխանությունները այս բեռի տակ չեն կարող անընդհատ մնալ: Արդեն կոծկելու տեղ չկա, պիտի կատարեն: Չեն կատարի` ժողովուրդը իր որոշումը կկայացնի»: