«Մաքսային միությանը Հայաստանի անդամակցության հարցը դեռ պետք է քննարկվի: Այս պահին ՀՀ-ն դեռ Մաքսային միությանն անդամակցելու թեկնածու չէ: Դրա համար էլ Բրյուսելի կողմից զգուշացումը կրում է նախազգուշական բնույթ»,- «Առաջին լրատվական»-ի հետ զրույցում հայտարարեց ՌԴ «Տնտեսագիտության բարձրագույն դպրոց» Ազգային հետազոտական համալսարանի համաշխարհային էկոնոմիկայի և համաշխարհային քաղաքականության ֆակուլտետի առևտրային քաղաքականության ամբիոնի ղեկավար, պրոֆեսոր Ալեքսեյ Պորտանսկին՝ մեկնաբանելով պաշտոնական Բրյուսելի զգուշացումը Հայաստանին, որ անհնար է համատեղել Ռուսաստանի նախաձեռնած Մաքսային միությունը Եվրամիության առաջարկած ազատ առևտրի գոտու մասին պայմանագրի հետ. դրանք իրավաբանորեն հակասում են միմյանց:
Նրա խոսքով՝ անձամբ իրեն հայտնի չէ, թե ՀՀ կառավարության ծրագրերում այդ առաջնահերթությունները ինչպես են բաշխված, այսինքն՝ ԵՄ ազատ առևտրի գոտու և Մաքսային միության անդամակցության հարցերը: Պորտանսկին նշեց, որ իրեն չեն պատահել փաստաթղթեր, որոնցից կարելի կլիներ հասկանալ, թե ՀՀ կառավարությունն ինքը ինչպես է այդ առաջնահերթություններն արտահայտում: Ամեն դեպքում, ըստ ռուս տնտեսագետի, այդ հարցերը կքննարկվեն դեռ ոչ մեկ անգամ. «Դա ոչ այսօրվա, ոչ էլ վաղվա որոշելիք հարց է, դրան դեռ կվերադառնան ոչ մեկ անգամ»:
Ա. Պորտանսկին նկատեց, որ Մաքսային միությանն անդամակցության հարցը ԵՄ-ն նման կտրուկ կերպով դնում էր նաև Ուկրաինայի առջև. «Դա կտրուկ հարցադրում է, բայց ավելի կոնկրետ, ամեն մի երկիր՝ լինի դա Ուկրաինան, թե Հայաստանը, հարցի լուծմանը կմոտենա առևտրաշրջանառությունից ելնելով, թե ում հետ է առևտրաշրջանառությունն ավելի շատ՝ ԵՄ երկրների՞, թե՞ Մաքսային միության երկրների հետ: Դրանով էլ հավանաբար կուղղորդվի ՀՀ կառավարությունը, նաև՝ որոշ քաղաքական նկատառումներից ելնելով»:
Հիշեցնենք, որ Եվրախորհրդարանի արտաքին հարաբերությունների հանձնաժողովի նախագահ, Եվրոպայի ժողովրդական կուսակցության փոխնախագահ Էլմար Բրոկը հայտարարել էր, թե Եվրամիությունը չի կարող Խորը և համապարփակ ազատ առևտրի մասին պայմանագիր ստորագրել մի երկրի հետ, որն անդամակցում է Ռուսաստանի առաջարկած Մաքսային միությանը, իրավաբանորեն դա հնարավոր չէ, անհրաժեշտ է ընտրություն կատարել, և դա պետք է անի ոչ միայն Հայաստանը, այլև` Արևելյան գործընկերության անդամ մյուս պետությունները, որոնք ևս ուզում են միանալ Եվրամիության առաջարկած ազատ առևտրի գոտուն։
