Վրացական Apsny.ge կայքի փոխանցմամբ, ԵԽ մարդու իրավունքների եվրահանձնակատար Թոմաս Համարբերգն ամփոփել է իր վրացական քառօրյա այցի արդյունքները.
«Երկար ժամանակ ես տարբեր աղբյուրներից տեղեկատվություն էի ստանում, որ Վրաստանում արդարադատության խնդիրն իր բարձրության վրա չէ: Դրա համար էլ վճռեցի այցելել Վրաստան և տվյալ խնդիրն ուսումնասիրել հենց տեղում:
Վրաստանի բնակչությունը մտահոգ է, որ մինչև դատը մարդկանց անհարկի պահում են կալանքի տակ, ապացույցների կեղծման մեղադրանքներ են հնչում, ոչ պրոֆեսիոնալ հետաքննություն են անցկացնում: Սրանք բավականին լուրջ մեղադրանքներ են, և եթե պարզվի, որ դրանք համապատասխանում են իրականությանը, ապա կստացվի, որ դատական համակարգի անկողմնակալությունն ու անկախությունը չեն համապատասխանում եվրոպական չափանիշներին:
Բացի այդ, ես բողոքներ եմ ստացել, որ 2007 թվականի նոյեմբերից մինչև 2009 թվականի գարունն ընկած ժամանակահատվածում ընդդիմության ցույցերի ցրման ժամանակ ոստիկանությունը չարաշահել է իր լիազորությունները: Ձերբակալված ցուցարարների նկատմամբ հարուցված դատական գործընթացները շատ են ձգձգվել:
Իմ այս այցի ժամանակ հավաքածս տվյալների հիման վրա ես կպատրաստեմ զեկույց և այն կներկայացնեմ ամռանը: Վրացական պաշտոնատար անձինք ինձ հայտնեցին, որ մտադիր են մշակվելիք նոր քրեական օրենսգրքի շրջանակներում լրջորեն դիտարկել խիստ դատավաճիռների և ծայրահեղ ցածր տոկոսային հարաբերություն ունեցող արդարացնող վճիռների խնդիրը»:
Հիշեցնենք, որ Վրաստանում Համարբերգը հանդիպումներ է ունեցել կառավարության, խորհրդարանի, քաղաքացիական հասարակության ներկայացուցիչների, ինչպես նաև Գերագույն դատարանի նախագահի, արդարադատության և դատավորների խմբի գերագույն խորհրդի նախագահի հետ: Բացի այդ, Համարբերգն այցելել է Ռուսթավիի բանտ: