Թուրքական Haberpan կայքի փոխանցմամբ, Թուրքիայի Բարձրագույն ընտրական խորհուրդը (YSK) վետո է դրել 12 անկախ թեկնածուների վրա, այդ թվում նաև քրդական «Խաղաղություն և ժողովրդավարություն» կուսակցության (ԽԺԿ) 7 ներկայացուցիչների թեկնածության վրա, որոնց թվում նույնպես կային ժամանակին թուրքական բանտերում հայտնվածներ:
Այս դեպքը Թուրքիայում հիշեցրել է 9 տարի առաջ` 2002 թվականի ընտրություններում, YSK-ի կողմից Էրդողանի վրա դրված վետոն, քանի որ նա ժամանակին ազատազրկում էր կրել Թուրքիայի նախկին քրեական օրենսգրքի 312-րդ հոդվածով: Այդ պատճառով էլ YSK-ն վճռել էր Էրդողանին զրկել թեկնածությունից` հենվելով Սահմանադրության 76-րդ և խորհրդարանականների ընտրական օրենքի 11-րդ հոդվածների վրա: Նշվում էր, որ անգամ համաներման արժանացածները չեն կարող պատգամավոր դառնալ:
Հիշեցնենք, որ 1994-1998 թվականներին Էրդողանը Ստամբուլի քաղաքապետն էր, սակայն 1998 թվականի փետրվարի 21-ին թուրքական դատարանը, կրոնական ու ռասիստական ատելություն բորբոքելու համար, Քրեական օրենսգրքի 312-րդ հոդվածի 2-րդ կետով Էրդողանին դատապարտել է մեկամյա բանտարկության և նշանակել 860 միլիոն (հին) թուրքական լիրա տուգանք (ցույցերից մեկի ժամանակ Էրդողանն արտասանել էր. «Մինարեթները մեր սվիններն են, գմբեթները` մեր սաղավարտները, մզկիթները մեր զորանոցներն են, իսկ հավատացյալները` մեր զինվորները»):
Էրդողանի բողոքարկումներից հետո նախ այդ պատժաչափը նվազեցվեց մինչև 10 ամսվա, իսկ տուգանքը` մոտ 177 միլիոնի, ապա Թուրքիայի Վճռաբեկ դատարանը 1998 թվականի սեպտեմբերի 24-ին վճռեց, որ Էրդողանը բանտում պետք է անցկացնի 4 ամիս:
Էրդողանը բանտից, ուր հայտնվել էր մարտի 26-ին, դուրս եկավ 1999 թվականի հուլիսի 24-ին:
