Ժառանգություն խմբակցության ղեկավար Ստեփան Սաֆարյանն այսօր «Փաստարկ» ակումբում հայտարարել է, թե ՀՀ երեք նախագահների օրոք ղարաբաղյան խնդրի կարգավորման տարբերակներն առանձնապես չեն տարբերվել միմյանցից, և եղել են միմյանց շարունակությունը:
«Եթե ուշադրություն դարձնենք 97-ի կարգավորման տարբերակի վերաբերյալ Լևոն Տեր-Պետրոսյանի հնչեցված գնահատականներին, ապա դրանք էապես չեն տարբերվում մադրիդյան սկզբունքներից, այսինքն` ինչ-որ տարածքներ հանձնել` Ղարաբաղի միջանկյալ կարգավիճակի դիմաց, հետագայում այն ճշգրտելու պայմանավորվածությամբ, որն իրենից ներկայացնում են մադրիդյան սկզբունքները, և իմ կարծիքով` չափազանց վտանգավոր են ղարաբաղյան խնդրի ապասառեցման այս համատեքստում նման դիսկուրսն ու նման շեշտադրումները, որովհետև սա այն է, ինչի զոհը դարձավ ղարաբաղյան հարցը, Արցախի ճանաչման խնդիրը, և հետևաբար, իբրև այլընտրանք, գոնե այս դիսկուրսում պետք է մտցվի այլ թեզ, որպեսզի դա շարունակություն չստանա, այլապես իսկապես ստացվում է, որ մենք կանգնած ենք նախկին ելման կետին վերադառնալու վտանգի առջև»,- նշեց նա:
Սաֆարյանի խոսքերով, շաբաթներ առաջ Մինսկի խմբի նախկին ամերիկացի համանախագահը հայտարարել էր, թե ԼՂ խնդրում կողմերն առավելապես մոտ են եղել խնդրի կարգավորմանը 2001թ-ին: «Գրեթե սա նման էր մի բանի` քննարկում բացել այն առումով, թե որ նախագահի օրոք է առավել իրատեսական եղել խնդրի կարգավորումը: Եվ սրան հաջորդում է օրերս BBC-ին Տեր-Պետրոսյանի տված հրապարակումը, որտեղ նա գրեթե պատասխանում է այս հարցին, հիշեցնելով, որ առավել մոտ կողմերը եղել են 1997-ին»,- ասաց նա:
