Հայաստանի Հանրապետության պաշտպանության նախարարությունը հաստատում է՝ Ռուսաստանի հատկացրած 200 միլիոն դոլար վարկով Հայաստանը այդ երկրից ձեռք է բերելու նաև հեռահար սպառազինություն: ՊՆ մամլո խոսնակ Արծրուն Հովհաննիսյանը, սակայն, ոչ հերքում, ոչ էլ հաստատում է այն տեղեկությունը, որ Հայաստանը պատրաստվում է ձեռք բերել «Իսկանդեր-Մ» հրթիռային համալիր։ Այս տեղեկությունն օրեր առաջ տարածել էր ռուսաստանյան TASS լրատվական գործակալությունը:
Թե՛ ռուսաստանցի և թե՛ ադրբեջանցի քաղաքագետները վստահ են՝ Հայաստանին վարկի դիմաց սպառազինություն տրամադրելուց հետո Ռուսաստանն անպայման զենք կմատակարարի նաև Ադրբեջանին:
«Առաջին լրատվական»-ի հետ զրույցում ռուսաստանցի հայտնի քաղաքագետ Սերգեյ Մարկովն անդրադառնալով այս հարցին՝ ասաց. «Այն, որ Ռուսաստանը զենք է վաճառում և՛ Հայաստանին, և՛ Ադրբեջանին, մի կողմից՝ լարվածություն է առաջացնում, մյուս կողմից՝ նպաստում խաղաղությանը: Ցանկացած տեսակի զենքի ավելացում մեծացնում է պատերազմի հավանականությունը: Բայց մյուս կողմից էլ՝ այդ երկրները զենք գնում են ոչ թե նրա համար, որ Ռուսաստանն է ցանկանում այն վաճառել, այլ պարզապես ուզում են ուժեղ և զինված լինել թշնամու առաջ»,- ասաց Մարկովը՝ հավելելով, որ եթե Ռուսաստանը չվաճառի զենք, ապա Հայաստանն ու Ադրբեջանը զենք կգնեն այլ երկրից:
Նրա խոսքով՝ զենք վաճառող երկիրը կարող է որոշակիորեն ազդել իրավիճակի վրա, և նրա տպավորությամբ՝ լավ է, որ զենք վաճառում է հենց Ռուսաստանը. «Որովհետև Ռուսաստանը խաղաղության կողմնակից է՝ ի տարբերություն Միացյալ Նահանգների»: Սերգեյ Մարկովն ավելացրեց. «Այն, որ հենց Ռուսաստանն է զենք վաճառում, շատ քիչ, բայց նպաստում է խաղաղությանը»:
Մեր այն հարցին՝ արդյոք Հայաստանի և Ադրբեջանի միջև ուժերի հավասարակշռությունը չի՞ խախտվի այն բանից հետո, երբ հաստատվի, որ Ռուսաստանը Հայաստանին «Իսկանդեր-Մ» տեսակի հրթիռային համակարգ է վաճառում, Մարկովը պատասխանեց. «Ես կարծում եմ, որ Հայաստանին «Իսկանդեր» տրամադրելու գործարքը չպետք է առանձին դիտարկել: Դա պետք է նայել այն կոնտեքստում, որ Ադրբեջանին ևս մեծ քանակությամբ զենք է տրամադրվելու: Եթե առանձին նայենք, ապա «Իսկանդերի» տրամադրումը, այո, կնպաստեր, որպեսզի ուժերի հավասարակշռությունը խախտվեր: Բայց Ադրբեջանին մեծ քանակությամբ զենք տրամադրելը կնշանակի, որ ուժերի հավասարակշռությունը չի խախտվում»:
Մեր այն ճշտող հարցին՝ փաստորեն, այս գործարքից հետո զենք է տրամադրվելու նաև Ադրբեջանի՞ն, Սերգեյ Մարկովը պատասխանեց. «Այո, անկասկած»:
Սերգեյ Մարկովի տեսակետը կիսում են նաև Ադրբեջանում: «Առաջին լրատվական»-ի հետ զրույցում Բաքվի Քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն ասաց, որ չի կարծում, թե Ռուսաստանն ի վերջո գնա այդ քայլին և «Իսկանդեր-Մ» վաճառի Հայաստանին: Նա ընդգծեց, որ դա «միֆ է, որ հնարել են հայաստանցի փորձագետները:
Միևնույն ժամանակ Ահմեդօղլուն ասաց, որ եթե այդ գործարքն իրականություն դառնա, ապա կխախտվի ողջ տարածաշրջանի կայունությունը, և բացի Ադրբեջանից՝ կհակադարձեն ու կփորձեն դա թույլ չտալ նաև այլ երկրներ՝ Թուրքիան ու Իրանը. «Կարծում եմ՝ դա տեղի չի ունենա ամեն դեպքում: Եթե լինի էլ՝ Հայաստանը 200 մլն-ից ավելի վարկ պետք է վերցներ: Միևնույն ժամանակ չեմ կարծում, թե նույնիսկ այդ դեպքում Ադրբեջանը շատ մտածելու բան կունենա. նորից զենք կգնենք Ռուսաստանից»:
Նա հավելեց, որ որոշ ժամանակ անց Ռուսաստանը անպայման կօգնի նաև Ադրբեջանին. «Ռուսաստանը վարկով կտա Հայաստանին, վաղը 2 միլիարդ դոլարի էլ կվաճառի Ադրբեջանին: Միշտ էլ այդպես է լինելու, միայն մի տարբերությամբ՝ Հայաստանը վարկով է վերցնում, Ադրբեջանը գնում է: Ռուսաստանը Հայաստանի վատ տնտեսական վիճակը միշտ կօգտագործի՝ երկիրն իր վերահսկողության տակ պահելու համար»,- եզրափակեց նա:
