Սաուդյան Արաբիան փորձ է արել կաշառելու գերմանացի լրագրողներին գերմանական ԶԼՄ-ներում երկրի մասին դրական հոդվածներ գրելու համար: Այդ մասին հաղորդում է Sueddeutsche Zeitung-ը: Նպատակը երկրի մասին դրական կարծիք ստեղծելն է:
Սաուդյան Արաբիայի դիվանագետները ենթադրաբար փորձ են արել վարձելու 5 լրագրողի, որոնց առաջարկվել է 7.5 հազար եվրոյի չափով աշխատավարձ և յուրաքանչյուր հոդվածի համար՝ 300 եվրո: Նյութերը պետք է թագավորական ընտանիքին ներկայացնեին դրական լույսի ներքո, նրանք պետք է լույս տեսնեին Գերմանիայի տարբեր քաղաքներում:
Լրագիրը տեղեկացնում է, որ Սաուդյան Արաբիայի կողմից արտասահմանյան լրագրողներին կաշառելու մասին տեղեկությունը բացահայտվել է 2015թ հունիսի 19-ին Wikileaks-ի կայքում: Կայքը տեղադրել էր Սաուդյան Արաբիայի ԱԳՆ-ի մոտ 70 հազար փաստաթուղթ, որոնց թվում էին նաև աշխարհի բոլոր երկրներում թագավորության դեսպանատների հետ հաղորդագրությունները:
Գերմանիայում Սաուդյան Արաբիայի դեսպանատունը հրաժարվել է միջադեպի առիթով մեկնաբանություններ տալուց:
