BRIC անդամ երկրները` Ռուսաստանը, Չինաստանը, Բրազիլիան և Հնդկաստանը, որոնց այս տարի միացել է նաև Հարավային Աֆրիկան` կազմակերպությունն այդպիսով վերանվանելով BRICS-ի, այսօր Չինաստանի Սանյա քաղաքում գումարել են իրենց հերթական գագաթնաժողովը:
Կազմակերպության անդամ երկրների ղեկավարները մտահոգություն են հայտնել Մերձավոր արևելքում և Հյուսիսային Աֆրիկայում տեղի ուենցող զարգացումների կապակցությամբ. «Մենք լուրջ մտահոգություն ենք հայտնում Մերձավոր Արևելքում, Հյուսիսային և Արևմտյան Աֆրիկայում իրավիճակի կապակցությամբ և անկեղծ ցանկանում ենք, որպեսզի այս իրադարձություններում ներգրավված երկրները հասնեն խաղաղության, կայունության, բարգավաճման և առաջըթնացի և իրենց ժողովուրդների օրինական պահանջներին համապատասխան իրենց արժանի տեղի զբաղեցնեն աշխարհում: Մենք կիսում ենք այն սկզբունքը, որ անհրաժեշտ է խուսափել ուժի կիրառումից: Մենք գտնում ենք, որ անհրաժեշտ է հարգել յուրաքանչյուր պետության անկախությունը, ինքնիշխանությունը, միասնությունն ու տարածքային ամբողջականությունը», ասված է հայտարարության մեջ:
BRICS անդամ երկրները աջակցություն են հայտնել ՄԱԿ-ին Լիբիայի հարցով` նշելով, որ կողմերը տարաձայնությունները պետք է կարգավորեն խաղաղ ճանապարհով, որտեղ ՄԱԿ-ն ու տարածաշրջանային կազմակերպությունները պետք է ունենան համապատասխան դերակատարություն: Աջակցություն է հայտնվել նաև Աֆրիկյան միությանը, որը միջնորդական դերակատարություն է ստանձնել ներլիբիական հակամարտությունում:
Չինաստանում հավաքված ղեկավարներն աաջակցություն են հայտնել Ռուսաստանին` Առևտրի համաշխարհային կազմակերպությանն անդամակցության հարցում, ինչպես նաև պատրաստակամություն են հայտնել օգնելու Ճապոնիային` երկրաշարժի հետևանքների վերացման գործում:
