Այսօր Լյուքսեմբուրգում ԵՄ արտգործնախարարները քննարկել են Հյուսիսային Աֆրիկայում ստեղծված իրավիճակը և Հարավային Կովկասի հարցը, մասնավորապես` Ղարաբաղի հարցը:
ՀՅԴ Հայ դատի և քաղաքական հարցերով գրասենյակի պատասխանատու Կիրո Մանոյանի գնահատմամբ, Լյուքսեմբուրգում կայանալիք քննարկումը Եվրամիության հաջորդ նախագահի, այսինքն` Լեհաստանի նախաձեռնությունն է:
Սակայն Մանոյանը մտահոգիչ համարեց այդ հանգամանքը` հաշվի առնելով այն փաստը, որ Լեհաստանի կառավարությունը Ղարաբաղի հարցում ոչ այնքան հստակ կեցվածք ունի: Մանոյանը հիշեցրեց, թե ինչպես մի քանի ամիս առաջ Ադրբեջանում Լեհաստանի դեսպանատնից հայտարարեցին, որ իրենց քաղաքացիներին արգելված է Ղարաբաղ գնալ Հայաստանից, իսկ Հայաստանի դեսպանատունը որևէ կերպ չմեկնաբանեց այդ հանգամանքը:
«Լեհաստանի հետաքրքրվածությունը ինչ-որ տեղ պետք է մտահոգությունների տեղիք տա»,- «Առաջին լրատվականի» հետ զրույցում ընդգծեց Մանոյանը:
Նա նաև փոխանցեց, որ կա տեղեկատվություն, որ ԵՄ արտգործնախարարների համապատասխան խումբը շուտով նաև ինչ-որ փաստաթուղթ պետք է պատրաստի ԼՂ հակամարտության մասին:
«Եթե հիմք ընդունելով, որ միջնորդը ԵԱՀԿ ՄԽ-ն է, պետք է փորձեն այլ բաներ անել, օրինակ` Ղարաբաղի իշխանությունների հետ հարաբերություններ հաստատել, ապա դա դրական կլինի, իսկ եթե պետք է փորձեն խաչաձևել իրավիճակը, ապա բացասականից բացի` ուրիշ հետևանք չի կարող ունենալ»- եզրակացրեց Մանոյանը:
