Այսօր նախընտրական քարոզարշավի վերջին օրն է, բայց քարոզարշավ անցկացնելու փոխարեն հացադուլ հայտարարած նախագահի թեկնածու Անդրիաս Ղուկասյանը շարունակելու է պայքարի իր ընտրած ուղին:
Ղուկասյանի նախընտրական շտաբի համակարգող Արմեն Գրիգորյանը «Առաջին լրատվական»-ի հետ զրույցում կարծիք հայտնեց, որ հացադուլն, անշուշտ, լայն արձագանք է գտել հասարակության կողմից և ապագայում սրա շնորհիվ կձևավորվի քաղաքացիական շարժում. «Մենք ստացանք հասարակության բավարար արձագանք, ընտրություններից հետո կամփոփենք այն և հույս ունենք, որ քաղաքացիական շարժման հիմք կդնենք: Մենք տեսնում ենք, թե ինչքան մարդ է մոտենում, իր համերաշխությունը հայտնում և ասում, որ պայքարը շարունակի, դա մեզ համար հիմք է, որ տեսնենք, որ հասարակության արձագանքը ևս կա: Պետք է հաշվի առնել նաև այն հանգամանքը, որ մենք 20 տարիների ընթացքում տարբեր պատմություն ենք ունեցել, և ժամանակ է պետք, որպեսզի հասարակությունը դուրս գա այս ստեղծված վիճակից և իր արձագանքների միջոցով միանա մեր առաջ քաշած քաղաքական խնդրին:
Մենք չենք մտածել որևէ արձագանքի մասին, մենք մտածել ենք քարոզարշավի մասին, չենք կանխատեսել շատ կամ քիչ արձագանք, մենք այն համարում ենք այնքան բավարար, որ շարունակում ենք մեր պայքարը»,- ասաց Ա. Գրիգորյանը:
Նշենք, որ ԵԱՀԿ/ԺՀՄԻԳ դիտորդական առաքելությունը իր երկու զեկույցներում էլ չի անդրադարձել թեկնածուի հայտարարած հացադուլին, ինչի կապակցությամբ Ա. Ղուկասյանն ասել է. «Երկարաժամկետ դիտորդների` Հայաստանում նախագահի ընտրությունների վերաբերյալ երկրորդ միջանկյալ զեկույցը չի անդրադարձել ՀՀ նախագահի թեկնածու Անդրիաս Ղուկասյանի կողմից առաջադրված պահանջներին ու դրանց գնահատականներին, դիտորդական առաքելության կողմից իմ պահանջների ու դրանց գնահատականների անտեսումը վկայում է, որ այդ առաքելության գործունեությունը որևիցե կապ չունի ժողովրդավարության հետ և հետապնդում է քաղաքական այլ նպատակներ»:
Հիշեցնենք, որ քարոզարշավի հենց սկզբից նախագահի թեկնածու, քաղաքագետ Անդրիաս Ղուկասյանը հացադուլ է հայտարարել՝ պահանջելով անվավեր ճանաչել Սերժ Սարգսյանի թեկնածությունը և ԵԱՀԿ/ԺՀՄԻԳ դիտորդական առաքելությանը դուրս հրավիրել Հայաստանից: Թեկնածուն իր հացադուլը կդադարեցնի փետրվարի 20-ին:
