Արժույթի միջազգային հիմնադրամի (ԱՄՀ) ղեկավար Քրիստին Լագարդը մերժել է Հունաստանին՝ հետաձգելու պարտքի հերթական տրանշի վճարումը, որը պետք է մարվի մայիսին: Այս մասին հայտնում է Financial Times թերթը:
«Վաշինգտոնում ելույթ ունենալով ԱՄՀ գարնանային հանդիպման ժամանակ՝ Լագարդը հաստատել է, որ ինքը Հունաստանի ֆինանսների նախարար Յանիս Վարուֆակիսին բացատրել է պարտքերի վճարման երկարաձգումից հրաժարվելու հիմնադրամի քաղաքականությունը՝ այն բանից հետո, երբ Աթենքն այս ամիս ոչ պաշտոնապես խնդրել է լրացուցիչ ժամանակ՝ վճարումը կատարելու համար,- գրում է պարբերականը:- Յանիս Վարուֆակիսը հայտարարել է, որ ինքն այդպիսի հայտով չի դիմել»:
«Լագարդի խոսքով՝ ինքն Աթենքին խորհուրդ է տվել քրտնաջան տեխնիկական աշխատանք կատարել՝ հունական տնտեսության բարեփոխումների ծրագրման և վստահության արժանի ծրագրի իրագործման նախապատրաստման համար ՝ լայն քաղաքական գործարքի հույս ունենալու փոխարեն, որի արդյունքում վարկատուները կկարողանային սառեցնել մնացած 7.2 մլրդ եվրո պարտքը»,- հայտնում է Financial Times-ը:
«ԱՄՀ տնօրենների խորհուրդը 30 տարվա ընթացքում վճարների հետաձգման որոշում չի ընդունել,- թերթը մեջբերում է Լագարդի խոսքերը:- Մենք հնարավորություն ունեինք արտահայտելու և բացատրելու վճարների հետաձգման ԱՄՀ քաղաքականությունը և պրն Վարուֆակիսին պատմական նախադեպեր ներկայացնելու»:
Թերթը մեջբերում է հինգշաբթի օրը Վաշինգտոնում Բրուքինգսի ինստիտուտում Վարուֆակիսի խոսքերը, ըստ որի՝ Հունաստանը պատրաստ է զիջումների գնալ վարկատուների հետ բանակցություններում, սակայն չի պատրաստվում մշտապես զիջումների գնալ, որոնք երկրի կառավարությունը վարկաբեկում են հույն ընտրողների աչքի առջև:
Թերթի տեղեկությամբ՝ Հունաստանի կառավարությունը չի ցանկանում ընդունել իր պարտքի վերաբերյալ համաձայնության նոր տարբերակը, որը, Աթենքի տեսանկյունից, կերկարաձգեր առկա իրավիճակը:
Մինչև մայիսի 12-ը Հունաստանը ԱՄՀ պարտքի մարման հաշվին պետք է վճարի 747 մլն եվրո։
Երկրի պետական բյուջեի միջոցները սպառվում են, և առանց եվրոգոտու երկրների կողմից ֆինանսական հերթական օգնության Հունաստանը չի կարողանա միաժամանակ ԱՄՀ-ին միջոցներ փոխանցել և շարունակել աշխատավարձեր ու թոշակներ վճարել:
