1894թ. այս օրը Տրապիզոնում ծնվեց հայ թատրոնի անվանի դերասան, ՀՍՍՀ վաստակավոր արտիստ (1935 թ) Համբարձում Խաչանյանը:
1 տարեկան հասակում ընտանիքով տեղափոխվել են Սիմֆերոպոլ, այնտեղ ավարտել է հայկական ծխական դպրոցի չորս դասարանները, այնուհետև ուսանել է տեղի ռուսական քաղաքային դպրոցում, որը հոր մահից հետո թողել է անավարտ, և ապա հետագայում ավարտել էքստերն կարգով։
Սափրիչ Միսակը, ով նաև թատերական կեղծամներ պատրաստող էր, որդուն հաճախ է տարել թատրոն՝ նրա մեջ արթնացնելով սեր դեպի բեմն ու թատրոնը: 1917թ. գերազանց գնահատականներով ավարտել է է Սիմֆերոպոլի կինոդերասանական ստուդիան։
Խաչանյանը դառնում է դերասան՝ Բաթում, Սուխում, Կրասնոդար, Սիմֆերոպոլ և այլ քաղաքներում հանդես գալով ռուսական, երբեմն նաև հայկական թատերախմբերի հետ։
Հենց Բաթումում խաղալիս էլ 1922թ. նրան տեսնում ու գնահատում է Վահրամ Փափազյանը և երիտասարդին իր հետ բերում Երևան։ Խաչանյանը դառնում է Առաջին պետթատրոնի դերասան։ Խաղացած դերերը թատրոնում՝ Առլեքին՝ «Միմոս», Պանդոլֆոն՝ Կ.Գոլդոնիի «Մրցանակով հարսանիք», Սգանարել՝ Մոլիերի «Դոն Ժուան»
Սանչո Պանսա՝ Ա.Լունաչարսկու «Ազատագրված Դոն Կիխոտ», Ֆալստաֆ՝ Վ.Շեքսպիրի «Վինձորի զվարճասեր կանայք», Սչաստլիվցև՝ Ա.Օստրովսկու «Անտառ» և այլն :
Խաղացած դերերը կինոյում՝ Բադալ՝ «Նամուս», Խդո՝ «Զարե», Շոր՝ «Շոր և Շորշոր», ծառա՝ «Չար ոգի», վարչապետ՝ «Խասփուշ», Կիկոս՝ «Կիկոս», Դարչո՝ «Պեպո», հայր Պողոս՝ «Սևանի ձկնորսները», Քաջ Նազար՝ «Քաջ Նազար»:
Մահացել է 1944թ. հունիսի 30-ին Երևանում:
