Այս շաբաթ ավելի վաղ հայտնի էր դարձել, թե ինչու է Ավրիլ Լավինը երկար ժամանակով անհետացել շոու բիզնեսից։ Տզի խայթոցից հետո աստղի մոտ զարգացել էր Լայմի ծանր հիվանդությունը։ People-ին տված հարցազրույցում Ավրիլն առաջին անգամ պատմել է դրա մասին։
Իսկ հիմա արդեն հայտնվել են նոր մանրամասներ: People-ին երգչուհին պատմել էր, թե ինչպես է իր վրա ազդել նման ծանր հիվանդությունը։
«Երբեմն ուժեղ ցնցում է հարկավոր, որպեսզի հետո գլուխ հանես քո առաջնահերթություններից։ Այդ պատճառով ինչ-որ տեղ ես շնորհակալ եմ այն բանին, ինչ տեղի ունեցավ ինձ հետ»,- հայտարարել է Լավինը։
17 տարեկանից սկսած՝ նա աշխատում էր հագեցած գրաֆիկով, իսկ հիվանդությունից հետո սկսել է խորհել իր կյանքի մասին: «Ըստ էության, ես երբեք ուղղակի ապրելու ժամանակ չեմ ունեցել։ Իսկ երբեմն ես այնքան էլ համոզված չէի, թե ինչ եմ ուզում՝ առողջություն, ընտանիք, սեր ու երջանկություն»։
Հիվանդությունն ազդել է նաև Լավինի կենսակերպի վրա. «Հիմա ես սնվում եմ միայն օրգանական սննդով և խմում եմ թարմ քամած հյութ՝ օրը երեք անգամ։ Ես զբաղվում եմ յոգայով, ժամանակ եմ հատկացնում մեդիտացիաներին, փորձում եմ ամեն օր լողալ կամ քայլել»։
Լիովին ապաքինվելուց հետո Լավինը նախատեսում է օգնել բոլորին, ովքեր հայտնվել են նման իրավիճակում, ինչպես նաև տեղեկացնել մարդկանց նման վտանգավոր հիվանդության մասին։ «Ընդհանրապես ես փակ մարդ եմ։ Բայց ես չեմ կարող ուղղակի նստել տեղում և ոչինչ չանել։ Ես ցանկանում եմ օգնել մարդկանց։ Առաջին հերթին պետք է մարդկանց պատմել նման հիվանդության մասին, որը եղել է իմ կյանքում։ Իրականում մարդիկ չգիտես ինչու չեն խոսում այդ մասին»,-իր պլանների մասին պատմել է Լավինը։
