Վրացական Apsny.ge կայքի փոխանցմամբ, Վրաստանի նախագահ Միխեիլ Սաակաշվիլին ուսանողների հետ հանդիպման ժամանակ հայտարարել է, որ Վրաստանում ի հայտ են եկել նոր տիպի քաղաքական գործիչներ, որոնք շոշափում են ժողովրդին հուզող խնդիրները և բավականին սուր քննադատության են ենթարկում կառավարությանը.
«Ձեզ ցանկանում եմ հայտնել, որ այդ երրորդ կատեգորիան իրենց իշխանության պահպանման տեսանկյունից շատ ավելի վտանգավոր է իշխող ուժերի համար, սակայն երկրի համար դա շատ լավ է:
Շատ լավ է, որ ի հայտ է եկել մի քաղաքական դաս, որը, թեև համաձայն չէ կառավարության հետ և ցանկանում է նրա հեռացումը, այնուամենայնիվ, ունի սկզբունքների ընդհանուր շրջանակներ. այն չի ատում սեփական երկիրը, կապ չի հաստատում թշնամու հետ և երկրի համար ցանկանում է պայծառ ապագա: Դա ճիշտ ընդդիմություն է:
Անձամբ ես հպարտանում եմ, որ գնալով մեր երկրի կառավարության ներսում և դրանից դուրս ի հայտ է գալիս այդ քաղաքական դասը: Մեր պայքարը գաղափարների պայքար է»:
Հիշեցնենք, որ օրեր առաջ Վրաստանի փոխվարչապետ, եվրաինտեգրման հարցերով պետնախարար Գիորգի Բարամիձեն հայտարարեց, որ Վրաստանում գոյություն ունեն ընդդիմադիր ուժեր, որոնք մտադիր են անկարգություններ ու բախումներ կազմակերպել այն հույսով, որ վերջին պահին Ռուսաստանը կմիջամտի գործին, և նրա զորքերի օգնությամբ կարելի կլինի տապալել վրացական գործող իշխանություններին:
