Բանտում գտնվող պոլսահայ հայտնի գրող, լեզվաբան և գործարար Սևան Նշանյանի փաստաբանները պատրաստվում են դիմել Վճռաբեկ դատարան՝ սահմանված պատժաչափը կրճատելու համար։ Այս մասին գրում է Թուրքիայում լույս տեսնող հայկական «Ակօս» շաբաթաթերթը։
Նշանյանի փաստաբան Գյուլչին Ավշարը նշել է, որ իր պաշտպանյալը մեղավոր է ճանաչվել «շղթայական հանցագործության» համար, մինչդեռ պահանջվող ազատազրկումը միանման հանցանքի համար է։ Ուստի դատարանները, որոնք տարբեր պատժաչափեր են սահմանել, իրականում հաշվի չեն առել այն հանգամանքը, որ հանցագործությունը ընդհանուր բնույթ է կրում։
Ավշարն ընդգծել է, որ ելնելով վերոնշյալ նկատառումներից՝ իրենք պայքարելու են Նշանյանի համար սահմանված պատժաչափը կրճատելու համար։
Նշենք, որ Սևան Նշանյանը 2013 թվականին երկու տարվա ազատազրկման էր դատապարտվել Իզմիր նահանգում կիսավեր թուրքաբնակ գյուղը վերակառուցելու և այն զբոսաշրջային խոշոր կենտրոնի վերածելու համար։ Թուրքական իշխանություններն իր քննադատական հայտարարություններով հայտնի Նշանյանի աշխատանքը համարել էին «ապօրինի շինարարություն» և քրեական պատասխանատվության ենթարկել։ Սակայն հետագայում նրա պատժաչափն ավելացվել էր՝ հասցվելով 11 տարի 8 ամսվա։ Բացի այդ, Նշանյանի համար ևս 3 տարի դեռ պահանջում են։