Տևական ժամանակ է՝ երևանյան և ոչ միայն խանութներում բացակայում են «Ալիշան» ՍՊԸ-ի պահածոներն ու չրերը, որոնք շուկայում լավագույնն էին իրենց որակով:
Արարատի մարզում տեղակայված այս գործարանի սեփականատերը, հիշեցնենք, իրանահայ Սերժիկ Մոսեսյանն է, որն անցած տարի մեծ խնդիրների առջև կանգնեց «Հայռուսգազարդի» պատճառով: Սպառած գազի դիմաց պարտքի հավելագրման հետևանքով գործարանը մի քանի անգամ արդեն մի քանի շաբաթով դադարեցրել է արտադրությունը, քանի որ անջատված է եղել գազամատակարարումը: Գործարանի սեփականատիրոջ խոսքով, սակայն, գազամատակարարումն անջատելու որոշումն ապօրինի էր, ինչպեսև գազամատակարարման դիմաց սահմանված գումարը: Սերժիկ Մոսեսյանի խոսքով՝ գործարանի աշխատանքները սկսելու օրվանից «Հայռուսգազարդը» մշտապես 11-12 տոկոսով ավել գումար է գանձել:
Գործարարն այսօր «Առաջին լրատվական»-ի հետ զրույցում ասաց, որ, նախ, չեն աշխատում, քանի որ սեզոնը չէ, և հետո՝ պատվեր չունեն:
Ինչ վերաբերում է «Հայռուսգազարդին», ապա, Մոսեսյանի խոսքով, վեճն այդպես մնացել է չլուծված: «Պետք է դատարան դիմեմ, բայց չեմ դիմում: Դատարան դիմելը միշտ կա, բայց դրանով հարց չի լուծվում: Եթե Հայաստանում դատարանով հարց լուծվեր, վաղուց կդիմեի: Եվ հետո՝ հասկանում եմ, թե դիմացինս ով է: Ես չեմ կարող նրանց դեմ որևէ բան անել»,-ասաց Մոսոսյանը՝ հավելելով, որ «Հայռուսգազարդի» հետ ձեռք բերված բոլոր համաձայնությունները, բանակցությունները դատարկ խոսքեր են եղել: «Ամեն ինչ սուտ խոսքեր են: Չեն ցանկանում իմ գումարները հետ տալ ու վերջ»,- ասաց գործարարը:
Նրա խոսքով՝ եթե անգամ արտադրությունը վերսկսեն էլ, ապա ռուսական շուկայում ստեղծված վիճակը, ռուբլու անկումը ոչ մի լավ բանի մասին չի խոսքում, և իրենք ապրանքի սպառման հետ խնդիրներ կունենան: «Մեր արտադրանքի հիմնական մասը սպառվում էր Ռուսաստանում, բայց հիմա այնտեղ ստեղծված վիճակը հույս չի ներշնչում վերսկսելու արտադրությունը: Տա Աստված, սեզոնին սկսենք աշխատել, բայց պատվեր չկա: Ռուբլու արժեզրկման պատճառով պատվերի ծավալները նվազել են: Բացի դրանից՝ իրենց մոտ ապրանքը թանկացել է, այստեղից էլ չեն տանում, ու շատ խառը վիճակ է: Դեռ սպասում ենք վիճակը կայունանա, բայց դա էլ հայտնի չէ՝ երբ կլինի»,- ասաց Մոսեսյանը՝ հավելելով, որ իրենց համար շատ դժվար է այլ շուկաներ գտնելը, երբ կառավարության աջակցությունը չկա: «Կառավարությունից ասում են, որ կաջակցեն, կլինի, բայց առայժմս դրանք միայն խոսքեր են, որոնք գործի չեն վերածվում»,- ասաց մեր զրուցակիցը:
«Ալիշանի» գործերը վատ են նաև տեղական շուկայում, որտեղ սպառվում է արտադրանքի միայն 10 տոկոսը: «Այստեղ էլ է դժվար, շատ դժվար է: Մարդկանց ձեռքը փող չկա, որ առևտուր անեն: Շուկան առհասարակ մեռած է»,- ասաց Մոսեսյանը՝ հավելելով, որ միակ ելքը սպասելն է: «Սպասում ենք, ուրիշ ճար չկա»:
