Al-Arabiya-ն հայտնում է, որ նավթի համաշխարհային շուկայում տեղի են ունենում արմատական և հիմնարար փոփոխություններ, և հաջորդ մի քանի տարվա ընթացքում այն լիովին կփոխի իր ուղեգիծը:
Նավթարդյունաբերության փորձագետները սպասում են, որ ԱՄՆ-ը լիովին կդադարեցնի գազ գնել Պարսից ծոցից, իսկ նրա փոխարեն ի հայտ կգան ասիական պետություններ, որոնց թվում գլխավորը կլինեն Չինաստանը, Ճապոնիան, Հնդկաստանը: Այդպիսով Ծոցի նավթային պաշարները կուղղվեն Արևմուտքից Արևելք:
Սաուդյան Արաբիան առաջիններից է, ով զգացել է այդ փոփոխությունը: Թագավորությունը Ճապոնիայի հետ համաձայնագիր է ստորագրել Օկինավա կղզում նավթի մեծ պաշարների պահպանման մասին, որը կազմում է թագավորության նավթի արտահանման ողջ ծավալի 16 %-ը: Դա արվել է հումքի արագ առաքման նպատակով, քանի որ նավթը պահպանվում է հիմնական գնորդներից ոչ հեռու:
Ըստ The Washington Times-ի, ԱՄՆ-ը «նավթային հեղափոխություն» է ապրում, և առաջիկայում երկիրը կհրաժարվի Պարսից ծոցից, հատկապես Սաուդյան Արաբիայից և Իրաքից նավթ գնելու անհրաժեշտությունից: Շուտով Չինաստանը կդառնա աշխարհի ամենախոշոր նավթ ներմուծողը: Դա վերաբերում է նաև Հնդկաստանին: Նավթի պահանջարկն աճում է նաև Ճապոնիայում, իհարկե ոչ այնպես, ինչպես Չինաստանում և Հնդկաստանում:
ԱՄՆ-ը սկսում է կենտրոնանալ էներգիայի ստացման այլ աղբյուրների վրա: Ակնկալվում է «սև ոսկու» հորատանցքերի հայտնաբերում Ամերիկա մայրցամաքի ծովային խորքերում, այդ թվում՝ Կանադայում, Մեքսիկայում և տարածաշրջանի այլ երկրներում:
Էներգետիկայի ոլորտի փորձագետ Դանիել Յուրջին նշել է, որ ԱՄՆ-ը տիրապետում է բավականին մեծ էներգետիկ ռեսուրսների և կարող է իրեն թույլ տալ դառնալ էներգետիկ առումով անկախ պետություն: Եվ դա առաջիկայում տեղի կունենա, քանի որ երկիր նավթի ներմուծման ծավալները 62 % -ից հասել են 40 %-ի:
Այս պահին ԱՄՆ–ը շարունակում է աշխարհում մնալ առաջին խոշոր նավթ սպառող պետությունը` օրական 18,9 մլն բարել: Չինաստանը սպառում է 8,9 մլն բարել, Ճապոնիան` 4,5 մլն, Հնդկաստանը` 3,3 մլն: Հինգերորդ խոշոր սպառողը Սաուդյան Արաբիան է, որը միաժամանակ հանդիսանում է խոշորագույն արտահանող: Երկիրը օրական սպառում է 3 մլն բարել նավթ:
