Սահմանադրական բարեփոխումների հայեցակարգի շուրջ քաղաքական ուժերի հետ նախաձեռնված հանդիպումների շրջանակում Սերժ Սարգսյանն այսօր ընդունել է նաև ԲՀԿ-ի կամ, այսպես ասած, նորացված ԲՀԿ-ի ղեկավարությանը:
Հանդիպման բովանդակային մանրամասներ, բնականաբար, հայտնի չեն, չեն հրապարակվում, ինչպես և մյուս ուժերի հետ հանդիպումների պարագայում, սակայն ի տարբերություն մյուսների հետ հանդիպումների՝ ԲՀԿ նորացված ղեկավարության հետ հանդիպումն ըստ էության առանձնահատուկ բնույթ է ստանում: Առանձնահատուկ՝ հատկապես այն պայմաններում, երբ հանդիպումը տեղի է ունենում Հայաստանից Հովիկ Աբրահամյանի բացակայությամբ: Նա, ինչպես հայտնի է, երկօրյա այցով Քուվեյթում է: Եվ ինչպես հայտնի է, նորացված ԲՀԿ գործունեության համակարգման խնդիրը դրված է հենց Հովիկ Աբրահամյանի վրա, իսկ այդ գործունեությունը, ինչպես կրկին հայտնի է, ընթանում է բավական վայրիվերումներով:
Ըստ էության, մի իրավիճակ է, երբ «Բարգավաճ Հայաստանն» իր ներկայիս տեսքով մնացել է Հովիկ Աբրահամյանի նոր հավակնությունների և Գագիկ Ծառուկյանի գույքային հին պահանջների ու հարցադրումների արանքում: Իրարամերժ տեղեկություններ են տարածվում, որ Ծառուկյանը կամ նրա անունից հանդես եկողները ԲՀԿ-ի հանդեպ գույքային կամ ֆինանսական այլ պահանջներ են ներկայացնում, միաժամանակ նաև կան տեղեկություններ, որ Ծառուկյանն ուղղակի պատրաստակամություն ունի ԲՀԿ-ից, այսպես ասած, հեռացողներին խրախուսել: Խոսքը պատգամավորների մասին է:
Ահա այս իրավիճակում, Հովիկ Աբրահամյանի բացակայության պայմաններում կայանում է Սերժ Սարգսյանի հանդիպումը ԲՀԿ նոր ղեկավարության հետ, ինչը մի կողմից՝ նշանակում է, որ Սերժ Սարգսյանն այսօր պաշտոնապես ընդունել է ԲՀԿ-ի կապիտուլյացիայի թուղթը, իսկ մյուս կողմից՝ նա ըստ էության ընդունեց արբիտրաժային իրավունքը՝ Հովիկ Աբրահամյանի և Գագիկ Ծառուկյանի միջև, առնվազն ԲՀԿ-ի մասով:
Սա իր հերթին ըստ էության նշանակում է իշխանության մեջ Հովիկ Աբրահամյանի դերի արմատական վերանայում, և այն դերը, որ ստանձնել էր Աբրահամյանը, և որը համարում էր շատ հարմարավետ՝ իշխանության մեջ առաջ գնալու համար, ըստ էության Սերժ Սարգսյանն ինքն է ստանձնում: Եթե մինչ այդ Հովիկ Աբրահամյանն էր հանդես գալիս որպես Ծառուկյան-Սարգսյան միջնորդ և փորձում էր, ըստ որում՝ ոչ այնքան անհաջող, միավորներ հավաքել և դիրքեր ամրացնել այդ խաղի վրա, ապա այսօր արդեն Սերժ Սարգսյանն է միջնորդի դեր ստանձնում Ծառուկյանի և Աբրահամյանի միջև՝ միջնորդական միավորները արդեն հավաքելով իրեն կամ տվյալ դեպքում արդեն ոչ թե միավորների հարց լուծելով՝ ելնելով եղած զարգացումներից, այլ պարզապես էլ ավելի ամրացնելով իր գերակա դիրքը ներհամակարգային զարգացումների վրա:
