«Եթե ԲՀԿ-ն դառնում է ընդդիմություն, միանշանակ, այո, կլքեմ ԲՀԿ-ն, քանի որ պետական աշխատողը ընդդիմության հետ որևէ աղերս սկզբունքորեն ունենալ չի կարող»,- «Առաջին լրատվական»-ի հետ զրույցում ասաց Աբովյանի Վ. Համբարձումյանի անվան թիվ 10 դպրոցի ԲՀԿ-ական տնօրեն Լիլյա Սառաջյանը:
Նրա կարծիքով՝ ճիշտ կլինի, որպեսզի ընդունվի և գործի կրթական հաստատությունների ղեկավարներին կուսակցական լինելն արգելող օրենք։ «Իրավական, բարոյական դաշտում դա միակ ճիշտ ճանապարհն է, դպրոցի տնօրենները պետության, ժողովրդի ծառայողներն են, ինչո՞ւ պետք է դպրոցի տնօրենը զբաղվի քաղաքականությամբ,»- հստակեցրեց նա:
Տնօրենից հետաքրքրվեցինք՝ եթե կարծում է, որ դպրոցի տնօրենները կուսակցական չպետք է լինեն, ապա ինչու էր նա համալրել ԲՀԿ-ի շարքերը, վերջինս պատասխանեց, որ ճիշտ չի համարում նման հարցադրումը, բացի այդ՝ կուսակցությանը անդամագրվել էր տնօրեն դառնալուց առաջ:
Ինչ վերաբերում է Գագիկ Ծառուկյանի բարեգործություններին, ապա նա չկարողացավ ասել՝ կշարունակի՞ Ծառուկյանը բարեգործություն անել դպրոցի համար, թե՞ ոչ:
Աբովյանի դպրոցների մյուս ԲՀԿ-ական տնօրենները հրաժարվեցին տեսախցիկի առջև խոսելուց, բայց պարբերաբար ընդգծում էին, որ կուսակցությունում չեն մնալու, և դպրոցները քաղաքականացված չեն:
Մանրամասները՝ տեսանյութում։
