Ամերիկահայ աշխարհահռչակ գրող Վիլյամ Սարոյանի անունով Բիթլիսում (Բաղեշ) գրադարան է բացվելու: Այս գաղափարի հեղինակը թուրք լրագրող Ահմեթ Թուլգարն է, ում հաջողվել է ստանալ քաղաքապետարանի համաձայնությունը: Այս մասին հայտնում է Թուրքիայի հայկական «Ակօս» թերթը:
«Սարոյանի ստեղծագործությունները կարդում եմ երիտասարդ տարիքից, նա ինձ համար շատ սիրելի գրող է: Այսպիսի գրադարան հիմնելու միտքը ծնվել է իմ և լրագրող ընկերոջս՝ Իսհակ Քարաքաշի մոտ: Մենք համատեղ շաբաթաթերթ ենք հրատարակում և կարծեցինք, որ կարող ենք նման պարտականություն ստանձնել:
Բիթլիսի համաքաղաքապետ Հուսեյին Օլանին այս գաղափարը դուր եկավ և նա տեղեկացրեց, որ Բիթլիսում Սարոյանի ընտանիքին պատկանող տունը կվերականգնվի և կհանձնվի գրադարանին: Սակայն շինարարության համար գումար է անհրաժեշտ: Այդ նպատակով արդեն հանգանակություն ենք սկսել: Մինչև տան վերակառուցումը մեզ ժամանակավոր տարածք կտրամադրվի:», – նշել է Թուլգարը՝ ավելացնելով, որ արդեն սկսել են ապագա թանգարանի համար գրքերի, լուսանկարների ու փաստաթղթերի հավաքագրումը:
Նշենք, որ 2014 թվականի դեկտեմբերին Կոմիտասի ինստիտուտի տնօրեն Արա Սարաֆյանի առաջարկով Բիթլիսի քաղաքապետարանը քվեարկությամբ որոշել էր քաղաքի Սարքոփ փողոցը վերանվանել Սարոյանի անունով:
Հավելենք, որ աշխարհահռչակ ամերիկահայ գրողը ծնվել է 1908 թվականին Ֆրեզնոյում: Նրա ծնողները՝ Արմենակ և Թագուհի Սարոյանները գաղթել էին հենց Բիթլիսից: Նրանք երկար տարիներ ապրել են այն փողոցում, որն այժմ կրում է Վիլիամ Սարոյանի անունը:
