Եգիպտոսի ընդդիմադիր «Ազգային փրկության ճակատ»-ի առաջնորդ Մուհամադ Ալ-Բարադեյը հայտարարել է, որ ընդդիմությունն իշխանություններից պահանջում է ձևավորել ազգային փրկության կառավարություն և հատուկ հանձնաժողով՝ երկրի սահմանադրության մեջ ուղղումներ մտցնելու համար,- հաղորդում է Interfax-ը:
Ալ-Բարադեյը Twitter-ի միկրոբլոգում գրել է, որ բռնության դադարեցումն առաջնային խնդիր է:
«Լուրջ երկխոսությունը պահանջում է, որպեսզի իշխանությունները երաշխիքներ ներկայացնեն, որոնց մասին ասել է «Ազգային փրկության ճակատը»: Դա, առաջին հերթին, ազգային փրկության կառավարության ձևավորումն է և հանձնաժողովի ստեղծումը` սահամանդրության մեջ ուղղումներ մտցնելու համար»,- գրել է Ալ-Բարադեյը:
Ավելի վաղ նա իշխանություններին, ընդդիմության ներկայացուցիչներին և իսլամիստներին կոչ էր արել հանդիպում կազմակերպել` երկրում բռնությանը վերջ տալու համար:
