«Նրանք մեզ ընկալեցին որպես մարդիկ, ովքեր տարածք են ներխուժում իրենց շեֆին փչացնելու համար». Սեֆիլյան

Շուշիի առանձնակի գումարտակի հրամանատար, «Հիմնադիր խորհրդարանի» անդամ Ժիրայր Սեֆիլյանն այսօր լրագրողների հետ հանդիպման ընթացքում հայտարարեց, որ Բերձորում հունվարի 31-ին տեղի ունեցած ծեծկռտուքը հրահանգվել է անմիջապես Արցախի իշխանությունների կողմից, Բաղրամյան 26-ի գիտությամբ:

Միևնույն ժամանակ Սեֆիլյանը վերահաստատեց այն հայտարարությունը, որ իրենց զգուշացրել, անգամ խնդրել են, որ դեպի Արցախ ավտոերթ չիրականացվի:

Արցախի իշխանությունների հետ հանդիպումից հետո ընդլայնված հանդիպում է եղել՝ փոխվարչապետի, գեներալների մասնակցությամբ: «Այդ հանդիպումից հետո ևս մեկ անգամ մենք համոզվեցինք, որ գործ ունենք մի կառավարման օղակի հետ, որը, մեղմ ասած, ադեկվատ չէ: Հանդիպման ամբողջ երկուսուկես ժամվա ընթացքում փորձում էին համոզել, օգտագործում էին անգամ «խնդրում եմ» բառը, որպեսզի այդ ավտոերթը չիրականացնենք: Ներկաներին ճանաչում եմ պատերազմից, բայց ուրիշ հարց, որ նրանք նյութապաշտությանը չդիմացան խաղաղ պայմաններում: Անընդհատ փորձում էին ընկերական խնդրել, որ մենք մեր մտադրությունից հրաժարվենք: Մեր դիմաց նստած գեներալ կոչեցյալները կարծես անձնական կարծիք չունեին, բոլորն արտաբերում էին այնպիսի մտքեր, որը պետք է դուր գար Բակո Սահակյանին»,- ասաց բանախոսը:

Սեֆիլյանն ընդգծեց, որ այդ հանդիպումներից հետո իրենք քննարկումներ են ունեցել Արցախում իրենց համախոհների հետ և որոշել, որ երթը միայն ժամանակավորապես հետաձգվի:

Ժիրայր Սեֆիլյանը հավելեց, որ իրենց պարզապես ընկալում էին մարդկանց, որոնք տարածք են ներխուժում իրենց շեֆին փչացնելու համար:

Բանախոսը նշեց նաև, որ եթե հունվարի 31-ին տեղի ունեցած ծեծկռտուքի ժամանակ իրենք խոհեմ չվարվեին, ապա չի բացառվում, որ զոհեր լինեին: «Մենք շարունակելու ենք մեր իրազեկման գործունեությունը, առաջիկայում ավտոերթ կանցկացնենք Շիրակի մարզում՝ Գյումրիում: Շատերի մեջ թյուրըմբռնում է, թե մենք խառնակչությամբ ենք զբաղվելու ապրիլի 24-ին, բայց ովքեր չեն հասկանում, որ այդ օրը ոչ թե սգի օր է, այլ վերածննդի՝ մենք կհորդորենք, որ միանան մեր գործընթացին»,-ասաց նա՝ միաժամանակ ընդգծելով, որ իրենք ևս այդ օրը հարգելու են Ցեղասպանության զոհերի հիշատակը՝ երկրորդ պլան չմղելով իրենց նախաձեռնած գործունեությունը:

Ժիրայր Սեֆիլյանը չի հերքում նաև մամուլում տեղ գտած այն տեղեկությունները, որ ինքը հանդիպել է ՀՀ պաշտպանության նախարար Սեյրան Օհանյանի հետ: Սակայն նրա խոսքով՝ այդ հանդիպումներն իր տանը չեն եղել:

 

Լուսանկարը` PAN Photo-ի